Kombate Korupsaun ho lei anti korupsaun…!!!

Kombate Korupsaun ho lei anti korupsaun…!!!

posted: Thursday, April 20, 2017 | 0 comments | 219 Views

Mandatu deputado Parlamento Nasional terseiru lejislatura nian hela deit fulan 4 tan atu remata. 20 Agusto mai, Parlamento Nasional iha ona deputado foun no membru governu foun hodi halo servisu lejislativu no ezkutivu nian.

Partido hat nebe dadaun nee asentu iha Parlamento Nasional, CNRT, FRETILIN, PD no Frente- Mudanca, partido sira iha tempo eleisaun parlamentar iha tinan 2012, promete ba povu atu kombate korupsaun, koluzaun no nepotismu wainhira eleitu ba tur iha parlamentu.

Mandatu tinan lima iha Parlamentu Nasional hela deit ona sura fulan ho liman fuan atu termina,  maibe povu komesa ejiji tusan promesa nebe sira halo nee kumpri duni ona ka lae? saida mak distintus deputado sira nee kontribuiona ba kombate korupsaun iha rai laran? Promesa nee tusan nebe tenki selu.

Deputado sira iha Parlamento nasional iha maneira barak atu kombate korupsaun liu husi fiskalizasaun ba projetu governu nian, fikaliza servisu governu nian no mos bele halo lejizlasaun ba kombate korupsaun.

Laos nee deit, Parlamento Nasional mos ohin loron nee adere ona ba  organizasaun ida nebe bolu Global Organisation of Parliamentarians Againts Coruption (GOPAC). GOPAC iha Timor Leste halao servisu importante atu oinsa bele kombate korupsaun  iha rai doben ida nee.

Laiha duvida, deputado sira halao servisu lubuk ida ona konaba kombate korupsaun nian, fikalizasaun ba servisu no projetu governu nian no mos lori parlamento Timor Leste tama GOPAC.

Agora kestaun mak nee, maske Parlamentu nee iha intensaun atu kombate korupsaun maibe povu kontinua duvida seriedade Parlamentu nian atu kombate korupsaun tamba too ohin loron Parlamento laiha boa vontade aprova lei Anti Korupsaun.

Timor Leste ohin loron nee iha ona Komisaun anti Korupsaun (KAK) maibe KAK ne harii tiha kuaze hira ona maibe KAK rasik laiha kompetensia tamba laiha lei nebe fo poder ba KAK atu halo ninia servisu ho diak.

Durante nee publiku KAK nee kurtinha deit, labele halao sira nia servisu tamba seidauk iha lei konaba Anti Korupsaun. Tan nee mosu opiniaun balu nebe dehan KAK nee laos Komisaun Anti Korupsaun maibe Kolega Asegura Kolega.

“Se  ita liga fila fali ho kestaun ne’ebé mosu korupsaun, pontu importante ida ne’ebé ha’u mós hakarak alerta ba deputadu sira mak ne’e, ita nia lei anti korupsaun ne’e, importante tebes,”, “Se la’e, kombate korupsaun sei la konsege hetan rezultadu ne’ebé masimu, wainhira ita husik liu prinsipiu sira importante hanesan ne’e,” Primeiru Ministru, Rui Maria de Araújo, Jornal Nacional Diario edisaun 19/4/2017.

Los duni senhor, tenki alerta atu sira hanoin kona se lae lei anti korupsaun nee budu too mandatu hotu. Sa tan, depois tomada de posse Presidente Republika 20 Maiu hotu, deputado sira preokupa ba sira nia partidu duke preokupa ba lei sira nee.

Maske seidauk iha lei Anti Korupsaun maibe KAK liun husi investigasaun nebe resultadu haruka ba Ministeriu Publiku konsege lori membru governu barak ba prosesa iha Tribunal no balu dezisaun sai ona maibe sei prosesu ba rekursu tan nee seidauk kumpri setensa tribunal primeira instansia nian.

Kazu konkretu, eis Ministro Edukasaun, João Cançio kazu TV Edukasaun, eis Ministra Finansas, Emilia Pires konaba partisipasaun ekonomia iha negosiu, ho eis Vice Ministra Saude, madalena Hanjam no mos membru governu balu iha hela lista prosesu KAK no Ministeriu Publiku nian.  Ne’ebe, publiku espera katak deputado sira antes mandatu termina, aprova ona lei Anti Korupsaun hodi nunee KAK bele uza hodi kombate Korupsaun sira nebe akontese iha Timor Leste. *