CNRT-FRETILIN sei kria rezolusaun kontra PR nomeia Deolindo

CNRT-FRETILIN sei kria rezolusaun kontra PR nomeia Deolindo

posted: Tuesday, May 09, 2017 | 0 comments | 92 Views

Bankada parlamentar CNRT no FRETILIN iha tempu badak sei aprezenta proposta rezolusaun ida ba Prezidenti Parlamentu Nasionál (PN) hodi bandu PN atu labele ratifika nomeasaun Prezidenti Repúblika (PR) Taur Matan Ruak nian, ba Prezidenti Tribunal Rekursu, Deolindo da Silva.

Iha deklarasaun polítika bankada CNRT nian ne’eb’e lee husi Deputadu Arão Noe, katak, CNRT no FRETILIN kestiona nomeasaun Prezidenti Tribunal Rekursu, ne’ebé mak Prezidenti Repúblika fó ona posse iha semana kotuk.

“Tanba ne’e, bankada CNRT ho bankada FRETILIN hakarak aprezenta rezolusaun ida, hodi la ratifika nomeasaun kargu Prezidenti Tribunal Rekursu, tuir kompetensia Parlamentu nian, ne’ebé estabelese iha konstituisaun artigu 95 númeru 3,” dehan Arão Noe iha plenária, Segunda (08/05).

Nia hatutan, nomeasaun ne’e bazeia ba artigu 6 konstituisaun ne’ebé hateten katak, nomeasaun ba Prezidenti Tribunal supremo. Entaun bazeia ba ida ne’e mak, Prezidenti Repúblika la’os nomeia Tribunal Rekursu, maibé Prezidenti Tribunal Supremo.

Arão dehan, bazeia ba artigu 164 hateten katak, antes atu instala Tribunal Supremo, Prezidenti Tribunal Rekursu mak ezerse nia funsaun ba kargu rua ne’e (Tribunal Rekursu no Tribunal Supremo).

Nune’e liga ba kompetensia Parlamentu Nasional nian, artigu 95 numeru 3, Parlamentu Nasionál ratifika nomeasaun Prezidenti Tribunal Supremo.

Nia esplika, rezolusasun ne’e, sei la kestiona nomeasaun Prezidenti Repúblika nian kona ba Prezidenti Tribunal Rekursu, maibé rezolusaun ne’e ko’alia kona ba PN atu ratifika ka la’e nomeasaun ne’e.

Alende ne’e, Arão Noe mós esklarese katak, CNRT ho FRETILIN sei aprezenta mós rezolusaun ida kona ba, nomeasaun Prokurador Jeral Repúblika.

Nia esplika, tuir estatutu katak, Prezidenti Repúblika bele nomeia ka extende tan mandate PJR ba dala ida, ka bele assume mandate ba dala rua.

“Tanba ne’e, ami la kestiona kona ba prolongga nia mandatu, buat ne’ebé mak ami kestiona katak, tenki rona Governu. Ida ne’e aktu ida ne’ebé ladun klaru ne’ebé Prezidenti Repúblika hala’o iha nomeasaun ida ne’e,” dehan Arão.

Nia afirma, CNRT ho FRETILIN mós kestiona relatóriu ne’ebé mak PJR aprezenta ba PN iha semana hirak liu ba, tanba iha relatóriu ne’e, sita kona ba violasaun konstituisaun.

Arão dehan, PN mós kestiona kona ba, agora dada’uk PJR kria gabinete iha nia okos, sem alterasaun ba lei estatutu instituisaun ne’e nian.

“Ida ne’e hanesan abuzu poder. Se abuzu poder, entaun labele hetan tan konfiansa atu prolonga tan nia mandatu dala ida tan. Relatóriu ne’e mós sita ema nia naran, semi ha prosesu judisiriu ida atu konfirma, pior liutan relatóriu ne’e hateten katak, kondenadu ona,” dehan Arão.

Vise Prezidenti Komisaun A ne’e afirma, iha mós indisius balu husi prokuradores balu katak, iha buat balu mak la’o ladun los iha Prokuradoria Jeral Repúblika nia laran. Tanba ne’e Arão dehan, laiha dalan ba Prezidenti Repúblika atu prolonga tan mandatu PJR nian, bazeia ba indisius sira ne’e.

Alende ne’e, Xefi bankada Partidu Demokrátiku (PD), Lourdes Bessa hateten, iha 2003 fulan Marsu, Parlamentu Nasionál aprova rezolusaun ida ne’ebé hateten katak, Parlamentu Nasionál  laiha nesesariu bainhira atu halo ratifikasaun ba nomeasaun Prezidenti Repúblika nian ba Prezidenti Tribunal Rekursu.

“Ita Parlamentu ne’e rasik resolve katak, la presija atu ratifika ba nomeasaun Prezidenti Tribunal Rekursu, no se ita hotu hanoin, bainhira Prezidenti Repúblika nomeia Juiz Guilhermino da Silva ba Prezidenti Tribunal Rekursu, Parlamentu mós la halo aktu ratifikasaun,” katak Lourdes Bessa.

Tanba ne’e, Lourdes Bessa dehan, se desizaun Parlamentu Nasionál nian la’o fali ba kotuk hanesan ne’e, entaun saida mak PN tenki muda agora, hodi obriga PN atu ratifika nomeasaun Prezidenti Tribunal Rekursu nian.

Lourdes Bessa mós kestiona CNRT nia intervesanu polítika ne’ebé hateten katak, PJR viola konstituisaun iha aspeitu balu.

“Ha’u hakarak husu, kna’ar ida ne’e Parlamentu nian ka? Konsellu Superior Majisratura mak tenki haree atu prova ka la prova PJR viola konstituisaun. Rezolusaun ne’ebé mak Parlamentu Nasionál bele aprova, iha poder juridíku ka la’e, atu anula ida ne’e, ou hanesan aktu polítiku ida,” lamenta Lourdes Bessa.cos

Be Sociable, Share!