Salariu minimu ne’e ba badaen, laos ba profesionalismu

Salariu minimu ne’e ba badaen, laos ba profesionalismu

posted: Tuesday, May 02, 2017 | 0 comments | 449 Views

Sekretariu Estadu Politika Formasaun Profesional no Empregu, Ilidio da Costa Ximenes dehan salariu minimu ho $115 ne’e ba ema ne’ebe laiha abilidade, ema ne’ebe iha profisaun tenki klaru iha kontratu laran.

“Atu simu servisu ruma tenki iha kontratu, se laiha kontratu ne’e mak sai problema, ema viola imi nia direitu dehan salariu minimu ne’e mak ne’e ona, lae. Salariu minimu ba ema ne’ebe mak laiha skil hanesan badaen, maibe ema ne’ebe iha ona profisaun tenki diferensia”, dehan Sekretariu Estadu Ilidio da Costa Ximenes ba trabalhador sira bainhira partisipa iha asaun dame ne’ebe halao husi Konfederasaun Sindikatu Timor-Leste (KSTL) iha Palacio Governo, Segunda (1/5/2017).

Bainhira trabalhador ida atu hahu kontratu tenki konsulta uluk KSTL no SEPFOPE, hodi bele hare direitu no dever trabalhador no kompania nian mak ida ne’ebe los.

Konaba salariu minimu, SEPFOPE halo ona estudu no lori ona ba debate iha Ministeriu Estadu Koordenasaun Asuntu Ekonomia no Ministeriu Agrikultura no peskas no atu avansa mai konsellu ministrus, hodi hare ba balansu ekonomia rai laran.

Tuir trabalhador ida ne’ebe sai vitima ba kompania Gardamor, Gilermi Fraga katak, tuir lolos Governu loke servisu fatin iha Timor, nune’e Timoroan hotu bele asesu hodi selu taxa, duke fasilita ema ba servisu iha estranjeru, selu fali taxa ba rai seluk.

Nune’e mos responsavel Foram, Letornino ‘La Tama’da Silva dehan kompania sira lainterese trabalhador nia saude no nia vida moris, entrese deit mak oinsa nia bele hetan rendimentu hodi habokur an. nty

Be Sociable, Share!