Manutensaun ba sentral elektrika 2, PN husu Governante kuidadu ho dezisaun

Manutensaun ba sentral elektrika 2, PN husu Governante kuidadu ho dezisaun

posted: Thursday, April 20, 2017 | 0 comments | 261 Views

Parlamentu Nasionál (PN) bolu atensaun ba Governante sira atu kuidadu ho desizaun ajudikasaun direta kona ba projetu manutensaun sentral elektrika Betano no Hera, tanba kuandu desizaun sala, obra rua ho investementu bo’ot ne’e sei infrenta obstaklu.

Prezidenti Parlamentu Nasionál (PN), Aderito Hugo da Costa, informa katak, PN fó ona nia hanoin hotu ho rekomendasaun ida konkreta ba Governu, tanba desizaun ne’e iha Governu nia liman.

“Tanba ne’e mak Parlamentu Nasionál hato’o ninia rekomendasaun ba Governu atu iha desizaun ba prosimu jestor ba manutensaun ne’e tenki ho kuidadu no rigor. Se ita halo desizaun sala, obra investementu bo’ot ne’e bele infrenta obstaklu,”katak Aderito Hugo ba jornalista sira iha Parlamentu Nasionál, Kuarta (19/04).

Aderito esklarese, Governu bainhira atu toma desizaun ruma labele ho emosionadu, labele ho referensia ne’ebé limitadu, maibé tenki kuidadu obra ne’e nia sustentabilidade.

 “La’os Parlamentu Nasionál apoiu, tanba kestaun ne’e ezekutivu nian. Parlamentu Nasionál liu husi komisaun Infra-estrutura akompaña polítika elektrifikasaun nasionál desde tau orsamentu ba ida ne’e ho detalla,”afirma Aderito Hugo.

Aderito dehan, Parlamentu Nasionál fó de’it ninia pareser katak, preferensia ida adekuadu liu mak, prosesu tranzisaun prosimu kompañia ne’ebé halo manutensaun tenki ho kuidadu, tanba obra ne’e bo’ot, no sensitivu tebes.

“Kualker dezisaun ne’ebé mak halo ba futuru manutensaun tenki ho kuidadu, tanba investimentu ne’e benefisia ona kuaze 80% povu Timor Leste hetan ona energia eletrisidade,” katak Aderito Hugo.

Nia haktuir, tendensia atu atinji 100% populasaun Timor Leste asesu ba eletrisidade, entaun jestaun ba kontinuasaun investimentu ida ne’e, tenki ho rigor.

Nia dehan, Governu tenki foti dalan ida ne’ebé mais adekuadu no apropriadu hodi rezulta dezisaun ida seguru ba sustentabilidade jestaun ba sentral elektrisidade Hera no Betano.

Oras ne’e dada’uk Governu foti ona desizaun hodi fó ajudikasaun direta ba kompañia Wartsila atu halo manutensaun ba sentral elektrika rua ne’e, ho orsamentu US$ 53 milloens. Manutensaun ba sentral elektrika rua ne’e, bainhira kompañia Puri Akraya mak kaer, nia orsamentu US$ 47 milloens de’it, maibé derpenti Governu foti desizaun hodi hapara kontratu ho kompañia Puri Akraya hodi fó fali ba kompañia Wartsila ho orsamentu US$ 53 milloens.

Antes ne’e mós deputadu Manuel de Castro, husi bankada FRETILIN hateten katak, Konsellu Ministrus aprova tiha ona ajudikasaun direta ida ba kompañia Wartsila.

“Ami haree iha kontratu ne’e hateten katak, enkuantu kontratu ne’e la’o hela, Governu labele halo buat ida. Se karik kompañia ida mak halo tan, Governu tenki kona multa, tanba ne’e mak ami fó hanoin de’it, keta halo ita kona tan multa hanesan iha 2013, ita selu ba kompañia internasionál ida ne’ebé halo ita nia Portu Hera. Karik ida ne’e mak akontese ba kompañia Puri Akraya atu lori ba tribunal, no ba mak nia manan, entaun ita tenki selu ba kompañia ne’e US$ 5 milloens,”relata Manuel de Castro ba plenária Parlamentu Nasionál Segunda (10/04/2017) foin lalalis.cos

Be Sociable, Share!