Avaliasaun servisu, Familiarizmu makaas iha Sekretariadu PN

Avaliasaun servisu, Familiarizmu makaas iha Sekretariadu PN

posted: Thursday, April 20, 2017 | 0 comments | 107 Views

Prezidenti Parlamentu Nasionál (PN), Aderito Hugo da Costa, Kuarta (19/04), realiza enkontru ho funsionáriu sira iha PN, ho objetivu atu halo avaliasaun ba lala’ok servisu iha PN nian durante ne’e.

Iha enkontru avaliasaun servisu ne’e, funsionáriu sira iha PN barak mak hato’o sira nia preokupasaun kona ba lala’ok servisu iha PN ne’ebé la monu iha sira nia laran.

Iha enkontru avaliasaun nee, funsionáriu Parlamentu Nasional  balu hateten katak, iha Parlamento Nasional ne’e familiarismu mak barak, tanba funsionáriu balu familia hatama de’it.

Familiarizmu nee mosu tamba funsionáriu PN balu tama hanesan estajiáriu, maibé hakfodak sai tiha ona funsionáriu sem konkursu. Maibé iha ema balu ne’ebé fó laran duni atu servisu, tuir konkursu hotu, maibé nunka atu sai funsionáriu iha PN.

Iha ekontru nee mos funsionariu sira hatudu sira nia sentimentu la kontenti ho lideransa sira iha PN, tanba buat ne’ebé mak sala, sira dehan los, no buat ne’ebé mak los, sira dehan sala.

Alende ne’e, funsionáriu balu mós lamenta katak, durante ne’e sira triste kona ba regras iha PN, tanba oras tama servisu iha PN ne’e, tuku 8:30, maibé funsionáriu sira tarde minute ida de’it, ko’a sira nia osan, maibé bainhira funsionáriu sira servisu to’o tuku 7:00 Otl ka tuku 8:00 Otl kalan, laiha ema ida atu tau matan ba sira.

Hatan ba preokupasaun sira ne’e hotu, Prezidenti Parlamentu Nasionál, Aderito Hugo hateten katak, nia ho superior sira sei diskuti preokupasaun sira ne’e hotu hodi buka solusaun.

“Ne’e enkontru jeral ne’ebé mak ami halo desde inisiu ha’u nia mandatu iha tinan kotuk, hahú kedas ho modelu ida ne’e, atu rona informasaun sira husi funsionáriu Parlamentu Nasionál hotu,” informa Aderito Hugo ba jornalista sira iha Parlamentu Nasionál, hafoin enkontru ho funsionáriu sira.

Aderito Hugo haktuir, nia kria enkontru alargadu ho funsionáriu Parlamentu Nasionál hotu ne’e, atu rona sira nia aspirasaun, opiniaun no observasaun funsionáriu sira nian ba dezempeñu lor-loron nian iha Parlamentu Nasionál.

“Karik durante ne’e iha regras ruma ne’ebé iha implementasaun, infrenta difikuldades ruma ba funsionáriu sira ne’e,” katak Aderito.

Nia esplika, durante ne’e, Parlamentu implementa regras ida kona ba kuandu funsionáriu sira tama servisu iha tuku 8:31 OTL, Konsellu Administrasaun PN nian ko’a sira nia osan.

Aderito afirma, regras ne’e hanesan teste ida ba funsionáriu sira iha PN atu disiplina ho oras servisu. Disiplina ida ne’e kria ho intesaun ida katak, fó oportunidade ba funsionáriu sira atu produtivu liu tan iha sira nia servisu.

Eis Segundu Vise Prezidenti Parlamentu Nasionál ne’e esklarese, haree ba karakter PN nian, funsionáriu sira iha dinámika no progresu.

“Parlamentu Nasionál komesa goza nia estatutu ida autonomo finanseiru administrasaun no patrimoniu hahú iha Fevereiru 2016. Kuandu  Governu sentral  komesa desentraliza autonomia ba orgaun sira hanesan ne’e, ita mós komesa aktualiza makina administrasaun Parlamentu nian atu dinamiza kompetensia ne’ebé mak Governu sentral delega dada’uk ona mai,”salienta Aderito.

Nia dehan, iha desentralizasaun ne’e mós, Parlamentu Nasionál infrenta obstaklu bo’ot ida, tanba  pezu servisu ne’e komesa aumenta, entaun ejiji supervizaun ida ba dezempeñu ho efisiensia no efikasia liu tan.cos

Be Sociable, Share!