Sekjer g7+ briefing Lu-Olo, Emilia laiha ona ligasaun ho g7+

Sekjer g7+ briefing Lu-Olo, Emilia laiha ona ligasaun ho g7+

posted: Wednesday, April 19, 2017 | 0 comments | 294 Views

Sekretáriu Jeral g7+, Helder da Costa ho nia ekipa hasoru malu ho Prezidenti Repúblika eleitu, Francisco Guterres ‘Lu-Olo’, hodi briefing Xefi Estadu eleitu ne’e kona ba lala’ok g7+ durante ne’e.

Helder da Costa informa katak,  g7+ hanesan Sekretáriadu inter-Govermental ne’ebé kompostu husi nasaun 20, hasoru malu ho Prezidenti Repúblika eleitu, Francisco Guterres Lu-Olo hodi informa kona ba lala’ok g7+.

“Ami mai briefing ba Prezidenti Repúblika eleitu, Francisco Guterres Lu-Olo, kona ba lala’ok g7+ iha nivel nasional no mós mundu global,” informa Helder da Costa ba jornalista sira iha Comite Central FRETILIN (CCF) Comoro Dili, Tersa (17/04), hafoin hasoru malu ho Lu-Olo.

Nia hatutan, iha oportunidade ne’e mós sira aproveita hodi briefing Lu-Olo kona ba Sekretáriadu g7+ nia eskritóriu ne’ebé mak iha Lisboa, hodi kobre servisu iha área Europa no Afrika, no hetan mós apoiu institusionál no apoiu polítiku husi Estadu Portugal.

Helder dehan, sira briefing Prezidenti Repúblika eleitu kona ba lala’ok g7+, tanba bainhira nia simu kna’ar hanesan Xefi Estadu, Lu-Olo mak sei tutela pasta kona ba polítika negosius estranjeirus.

“Ami mós hakarak hateten de’it katak, husi g7+ ita suporta polítika estranjeiru no polítika externa Timor Leste nian, tanba ita maske ki’ik oan, maibé ita nia naran ne’e bo’ot tebes iha mundu tomak,” katak Helder.

Nia dehan, Sekretáriu Jeral Nasoens Unidas mós apresia no louva tebes papel Timor Leste ho nia lideransa sira ne’ebé konsege fahe esperensia ba rai seluk, li-liu iha São Tome Principe, Guinea Bissau, Repúblika Central Afrikana, no mós iha nasaun akontese krize.

“Ami mai briefing Prezidenti Repúblika, atu bainhira nia simu tomada de pose iha 20 de Maiu, nia bem informadu kona ba g7+, no ami hetan resposta ne’ebé positivu, no Prezidenti Repúblika eleitu mós fó nia apoiu polítika ho apoiu moral kona ba g7+,” relata Helder.

“Laiha ona ligasaun ho Emilia Pires, tanba ida ne’e ita ko’alia kona ba inter-Govermental, entaun Governu nasaun 20 nian, entaun Ministru sira iha g7+ mak deside,” relata Helder da Costa.

Nia hatutan, Emilia Pires agora dada’uk iha nia kazu ketak kona ba judisiar, maibé husi parte g7+ la haree kona ba kazu ida ne’e, maibé haree ba kontestu nasaun nian.

“Ami haree kona ba kontestu nasaun nian, no intrese nasaun nian iha nasuan 20 ne’e, oinsa mak ita sai lalais husi frajilidades, hodi nune’e ita bele presta servisu ba ita nia populasaun iha nasaun komflitu sira ne’e,” dehan Helder.

Nune’e mós, Prezidenti Repúblika eleitu, Francisco Guterres Lu-Olo, hateten katak, nia hetan briefing husi ekipa g7+ atu hatene di’ak liu tan kona ba lala’ok g7+ ne’e rasik.

“Ha’u hanoin katak, g7+ organizasaun ida ne’ebé foin hahú, maibé nia iha potensialidade ne’ebé bo’ot tebes atu bele avansa ba iha future. Ha’u dehan katak, g7+ ne’e iha potensialidade, tanba nasaun sira ne’ebé forma organizasaun ida ne’e, hamutuk 20,” relata Lu-Olo.

Nia hatutan, Timor Leste hanesan nasaun ida ne’ebé lidera uluk g7+ ne’e, hala’o nia misaun iha nasaun sira seluk, atu hatudu g7+ nia misaun kona ba garante paz, estabilidade no dezenvolimentu.

Partikularmente iha g7+, hamorin tebes naran Timor Leste iha mundu, li-liu hafoin resolve tiha komflitu iha Guinea Bissau.

“Aban bainrua, kada rai ida-ida bele hatene oinsa mak lori dezenvolvimentu sustentavel ba rai ida-ida atu labele hetan krize ekonomika, finanseira ka krize social no buat seluk tan. Ha’u foin rona informasaun, ha’u mós intresadu tebes atu rona informasaun ida ne’e,” katak Lu-Olo.

Prezidenti Repúblika eleitu ne’e mós kontenti tebes, tanba Universidade Coimbra bele loke odamatan ba nasaun membru g7+ atu tama iha universidade Coimbra ne’e atu bele ko’alia kona ba área direitu no ekonomia nian.

“Ha’u sei lori ida ne’e iha ha’u nia liman, atu aban bainrua ita bele la’o hamutuk hodi bele hadia di’ak liu tan ita-nia rai, iha kontestu g7+ nian,” katak Lu-Olo.

Alende ne’e, Lu-Olo mós informa katak, nia senti onradu tebes, tanba simu ona konvite husi g7+ atu sai orador prinsipal ba avertura komfrensia g7+ nian ne’ebé mak sei hala’o iha Dili.cos

Be Sociable, Share!