PN preokupa negosiante Chines barak loke kios iha TL

PN preokupa negosiante Chines barak loke kios iha TL

posted: Wednesday, April 19, 2017 | 0 comments | 87 Views

Prezidenti bankada Partidu Demokratiku (PD), Adriano do Nascimento, hatete, nia parte preokupa maka’as ho negosiante Chines barak loke kios iha Timor-Leste (TL).

“Iha ita nian nasaun liu-liu iha Dili laran to’o Suku sira, ita nian maluk sira husi China barak liu loke kios, iha ha’u nian uma sorin China loke kios hat ka lima kedas ona, kios Timor nian ne’e la sae hela deit,”Adriano do Nascimento hato’o lia hirak iha nia intervensaun liu husi diskusaun Lei Investimento Privado  ne’ebé hala’o iha Parlamentu Nasional, Tersa (18/4/17).

Tuir Adriano do Nascimento, katak, kona-ba lei ivestimentu ne’ebé mak Parlamentu Nasional aprova tiha ona oinsa Governu atu fo protesaun ba Timor oan sira iha area investimentu nian.

 “Ha’u haree China mos agora ho kaki tiga la’o ona dudu gerobak faan sate, Ayam potong, oinsa protesaun ba Timor oan sira no antisipasaun saida mak prevé ona iha lei investimentu ne’e em quanto Timor ne’e sai membru ASEAN? Tanba prinsipiu ASEAN ne’e ita loke aan, ema sira iha nasaun ASEAN ne’e bele mai halo investimentu no bele halo bisnis saida deit iha Timor ne’e. Ha’u husu ba Ministru Agrikultura oinsa halo kontrolu ba ita nian maluk China sira ba to’o iha suku teritoriu Timor laran ne’e lori diak ba ita nia ema,”sujere Adriano do Nascimento.

Nune’e mos Deputadu Bankada FRETILIN, Osorio Florindo, hatete, Timor Leste adopta sistema merkadu livre, tanba ne’e presiza regulariza ema estranjeiru sira ne’ebé mai investe iha Timor Leste.

 “Agora povu preokupa ho merkadu livre. Ne’e ita labele taka ita nia aan. Maibe hanesan nasaun tenki regulariza ema tama mai ne’e priense kriteria mak bele tama, tanba ha’u hatene ema China nia simbolika moris ne’e dehan, banhira sira fatin ne’ebé sira moris diak sira nia rain mak ne’e. sera que ita duni sira fila? Ha’u fiar katak ita la duni sira ona.  Maibe sira tenki priense kriteriu sira mai investimentu entrajeiru tuir lei  ne’e hateten,”nia subliña.

Responde ba preokupasaun Deputadu sira nian, Ministru Angikultura no Peskas, Estanislau da Silva, hatete, ho lei migrasaun ne’ebé Parlamentu Nasional rasik aprova, ba oin bele kontrola maka’as liu tan.

“Governu rekoñese ida ne’e ho lei migrasaun ne’ebé Parlamentu rasik aprova ita bele kontrola maka’as liu tan konaba lei rejistu komersial bele kontrola liu tan,”haktuir nia.

Estanislau afirma, kona-ba negosiante Chines iha Timor-Leste, rejistu husi SERVE la to’o 200 mil, maibe negosiante ne’ebé halo negosiu iha Timor barak liu husi Indonesia.

“Ami halo levantamentu ida kona-ba negosiante Chines sira iha ita nia rai laran rejistu husi SERVE lato’o mil duzentos tanba sira balu rejistu tiha ho Timor nia naran. Ema sira ne’ebé rejistu barak liu maka negosiante Repúblika Indonesia sira,”nia esplika.car

Be Sociable, Share!