CI husu Media respeita kode étika, RTTL agradese ba CI

CI husu Media respeita kode étika, RTTL agradese ba CI

posted: Thursday, March 30, 2017 | 0 comments | 204 Views

Presidente Conselho Imprensa (CI) Virgilio Guterres husu ba média sira atu respeita nafatin kode étika jornalismu nian, tanba sei iha nutísia balun nebe iha problema.

Presidente Conselho Imprensa (CI)  Virgílio Guterres hatete nu’udar hatur nanis ona iha lei komuniksaun sosial no estatutu Conselho Imprensa nian katak, CI nia kompetensia atu promove liberdade espresaun no liberdade imprensa, promove independensia ba meius komuniksaun sosial nian husi kuelker influensia individu, grupo ka interese polítiku no ekonómiku sira, asegura katak asesu ba profisaun jornalista sei halo tuir kondisaun legal sira nebe aplika.

Maibé tuir Prezidenti CI ne’e katak, media nia kobertura durante iha eleisaun fó liu espasu boot liu ba KAPRES iha kbiit halo mobilizasaun ba masa.

“Tuir ami nia haree jeralmente katak media sira nia kobertura durante eleisaun presidensial ne’e fó bo’ot liu ba kandidatu sira nebe hetan apoiu husi partidu i iha rekursu bo’ot liu atu halo mobilizasaun masa, iha ne’e ita bele dehan kandidatu Lu-Olo no António da Conçeicão, tanba kandidatu sira ne’e hetan apoiu husi sira nia partidu entaun ida ne’e sai valor ba media hotu,” dehan Virgilio Guterres iha nia knar fatin CI, Segunda (27/03/2017).

Nia dehan tan promove no asegura atu aktividade jornalista bele dezenvolve ho profisionalismu hodi respeitu padraun kode étika no promove dialogu entre órgaun komunikasaun sosial, sosiedade no órgaun estadu sira seluk.

Nia dehan tan, Media sira mos ladun fo espasu ba kandidatura independenti sira hanesan ema hatene hotu sira ladun iha rekursu atu mobiliza masa ou atu halo movimentasaun husi Dili ba Munisipiu seluk, bele dehan publiku ladun hetan informasaun klean husi kandidatu sira ne’e.

“Ami nota mos katak media sira fo espasu barak liu la’os ba kandidatu Presidente, maibé fo ba ema nebe apoiu, iha ne’e ami bele dehan hanesan kandidatu Lu-Olo nian dala ruma notisia nebe tun ladun barak kona ba saida maka Lu-Olo hatete mas barak liu maka Alkatiri nian no Presidenti CNRT Xanana Gusmão nian maka barak tun iha neba,” dehan nia.

Nia esplika tan katak, iha eleisaun Presidensial ne’e vontante sira ba hili ema tanba ne’e maka presiza rona ema ne’e nia hanoin, ida ne’e maka importante kuandu eleisaun Parlamentar ne’e oin seluk tanba ema hili partidu.

Presidente CI mos apresia ba Media balun (Diário Nacional, Timor Post, STL, Independen ) maske iha faillansu maibé CI nota katak iha ona peningkatan liu-liu iha utilizasaun liafuan kompara ho molok eleisaun nian i CI mos apresiasaun maka’as ba estasaun Televisaun edukasaun (TVE) nebe bele hamosu programa “D’Challenges” nebe fasilita kandidatu sira ba koalia no tulun votante sira atu hetan informasaun husi kandidatu sira.

Nia mos hato’o lamentasaun no laran susar ba RTTLep hanesan orgaun komunikasaun Estadu nian nebe iha responsabilidade loloos atu fo informasaun ba publiku maibé CI haree katak durante periodu kampaña Presidensial RTTLep la reserva direitu nia antena ba kandidatu sira ne’e.

“Depois de kontaktu ho ekipa susesu kandidatu sira ne’e, nem kandidatu sira hetan konvite husi RTTLep atu ba iha studio televizaun atu fó sira nia mensajen ba iha publiku, buat nebe que loloos RTTLep tenki garante tanba lei eleisaun ninian, lei eleitoral nian iha neba garante katak kandidatu ou partidu sira hetan direitu de antena ho órgaun komunikasaun sosial hotu tenki reserve direitu ida ne’e satan orgaun komunikasaun televizaun nian,” dehan nia.

RTTL agradese ba observasaun CI

Hatán ba deklarasaun husi Prezidenti CI ne’e, Ko’ordenador Redasaun Televizaun Timor Leste Dacky Belo hato’o agradese ba CI ne’ebé halo ona observasaun servisu media nian iha Timor Leste (TL) inklui mós RTTLep.

“Ami apresia ba rezultadu nebe fo sai husi Conselho Imprensa ba programa sira nebe lansa iha RTTL maibe ba programa sira ne’e ami halo ona esforsu masimu atu bele koresponde ba iha publiku tomak liu-liu kandidatu nain 8 durante nia kampaña to’o iha eleisaun Presidensial,” dehan Ko’ordenador Redasaun Televizaun Timor Leste Dacky Belo iha nia knar fatin, Kuarta (29/3/2017).

Nia dehan tan iha RTTL mos iha programa nebe espesial ba kandidatu nain 8 nebe hanaran programa dalan ba palacio programa ne’e mos RTTL fo prioridade durante kandidatu sira hala’o kampaña.

“Ami hakarak hatete durante kampaña to’o eleisaun Presidensial ami iha programa espesial nebe maka ami koloka ba kandidatu Presidente repúblika. Ezemplu hanesan informasaun televizaun nian ami iha programa kona ba profile kandidatu Presidente sira nebe fo sai hahu kedas dia 3 de Marsu to’o dia 17 de Marsu, programa ne’e ami aprezenta ba publiku no telespetadores tomak nebe akompaña kanal televizaun nian, ida ne’e atu publiku bele koñese diak liutan kandidatu sira ne’e, durasaun ba programa ne’e durante 45 minutus,” dehan nia.

Konaba observasaun CI nebe dehan laiha kandidatu ida hato’o mensajen liu husi kanal RTTL, Dacky Belo, husu ba CI tenki hatudu mos faktus nebe konkreta katak iha parte ida nebe maka RTTL lahatun la fo kanal ba kandidatu sira nebe aprezenta sira nian programa.

“Ami husi RTTL iha koperasaun di’ak ho CNE, ami organiza debate publik ida ba kandidatu nain 8 iha dia 17 Marus, final husi sira nia aktividade kampaña. Entaun programa ida ne’e maka ami konsege halo no fo espasu ba kandidatu tomak atu aprezenta sira nia programa, normalmente ami la fo kanal espesial iha radio no televizaun maibe kanal ida ne’e maka propriu ba kandidatu sira. Ha’u hanoin CI mós tenki onestu ba buat nebe RTTL halo ona,” dehan nia

Konaba kolokasaun ba kada sentru votasaun nia dehan RTTL iha limitasaun rekursu humanus entaun iha momentu neba RTTL mos halo esforsu masimu rasik, ba sentru votasaun iha Dili ekipa konsege halo kobertura ba kandiatu tomak wainhira halo votasaun, so nain rua deit maka halo votasaun fora husi sidade Dili maka Luis Alves Tilman no Amorin.

“Kestaun ida nebe ami tenki onestu ba publiku no telespetadores tomak katak ami husi RTTL iha limitasaun rekursu humanus ho fasilidade nebe iha liu-liu transporte públiku, atu tau ami nia pesoal tomak iha kada sentru votasaun hau hanoin imposivel oituan ba situasaun oras ne’e. Ha’u hanoin CI mos tenki fo honra ba media nebe fo susesu ba eleisaun no kampaña Prezidensiál,” Dacky Belo esplika.

Nia esplika liu tan observsaun husi CI ne’e hanesan pasu importante atu bele hadia di’ak liu tan, servisu husi media sira nian, buat nebe tenki onestu maka Media tomak komesa evita ona informasaun husi kandidatu rasik kona ba insulta malu, koalia aat kandidatu A no B, media la tau konsiderasaun no importansia ba ida ne’e.

Nia dehan tan husi RTTL la’o ho orsamentu ketak ida husi instituisaun rasik, klaru RTTL mai husi Estadu entaun RTTL hetan suporta husi Estadu.nes

Be Sociable, Share!