Atlletas TL partisipa iha Youth Atletik no Filipina Open

Atlletas TL partisipa iha Youth Atletik no Filipina Open

posted: Thursday, March 23, 2017 | 0 comments | 215 Views

Atletas Timoroan na’in 8 husi Federasaun Atletismu Timor Leste (FATL) partisipa iha eventu Youth Atletik no Filipina Open, iha Filipina.

Delegasaun TL ne’e kompostu husi treinador 1, team lider nain 1 no atletas na’in 8, ne’ebé sei partisipa iha klase halai nian ne’ebé fahe ba kategoria 4 hanesan 1500 metrus, 3000 metrus, 5000 no 800 metrus.

Prezidenti Federasaun Atletismu TL, Afraino Xavier informa katak, atleta sira ne’e mai husi Munisípiu Ermera na’in 7 no Díli na’in 1.

Afraino hateten katak, delegasaun sira ne’ebé ba ne’e, liu husi selesaun, tanba eventu ne’e importante ne’ebé partisipa husi south Asean nian.

“Imi ba tenki kompete ho fair play ho espíritu ne’ebé mós, hatudu ba mundu katak ita lakon mós tenki lakon ho digñu labele lakon ho moe. Tanba ne’e maka ami desidi ita bo’ot sira ba ne’e, ami konta hotu ona kompara ho forsa ne’ebé Indonesia, Thailandia, Filipina ami sukat hotu ona, ita bo’ot sira ba mós sei la lakon ho moe,” dehan Afraino Xavier iha nia knar fatin GMT, Kuarta (22/03/2017).

Iha fatin hanesan Sekretariu Estadu Juventudi no Desportu (SEJD), Leovigildo Hornai husu ba atletas TL tenki fiar-an, labele sente marzinalizadu ou sente inferior husi nasaun seluk.

“Hanesan nasaun ita mós nasaun, sira ema ita mós ema, skil ne’ebé sira iha, ita mós iha. Ita ba labele hakruk sente hanesan sira maka bele, mas imi tenki hatudu dehan katak ita mós bele. Tenki iha serteza katak ha’u sei bele halo buat ruma ba ha’u nia nasaun. Ha’u husu ho haraik-an ba ofisiais no treinador buka atu halo sira kontente no alegria, maibé nafatin disiplina, moral hanesan estudantes,” dehan Leovigildo Hornai.

Nia dehan tan liu husi orasaun, suporta, moral ba atleta sira hotu, kuidadu-an i tenki aprende liu tan hodi kompete nafatin.

“Molok imi atu kompete keta haluha reza, hamulak para depois fó forsa ba imi no labele hetan susar nune’e bele kompete ho di’ak iha eventu ne’e. Tenki hanoin manan, lakon ne’e buat seluk ida, atu hetan primeiru, segundu ou terseiru lugar ne’e la’os kestaun maibé tenki hanoin ha’u tenki manan,” dehan nia.

Nune’e mós team lider Odete Belo hateten katak, preparasaun ba atleta sira ne’e durante fulan tolu, hala’o treinamentu iha Ermera no Dili.

“Ami labele promete atu lori medalha mai Timor Leste maibé husu ba Aman Maromak atu haraik forsa mai ami atu luta maka’as no esforsu maka’as atu bele hamorin naran nasaun ne’e iha mundu. Ami mós prontu ona atu kompete ho nasaun sira seluk tanba ami nia atleta mós treinu maka’as,” dehan Odete.

Entretatu atleta Rumbia Fatima Martins dehan hanesan atleta prontu ona atu kompete ho nasaun sira seluk tanba durante ne’e preparasaun ne’ebé iha masimu tebes.

Atletas ne’ebé sei kompete iha 1500 metrus maka Manuel Belo, Ermelinda Hornai, Rosalino Gomes, Octaviana Soares. 3000 metrus maka Goveia Martins, Felisberto de Deus, Octaviana Soares. 5000 metrus maka Rumbia Fatima Martins, Ermelinda Hornai, Felisberto de Deus, Rosalino Gomes no ba 800 metrus maka Roberto Belo Amaral.nes

Be Sociable, Share!