Papel PR atu preokupa ho situasaun hotu-hotu

Papel PR atu preokupa ho situasaun hotu-hotu

posted: Friday, March 17, 2017 | 0 comments | 218 Views

Prezidenti Repúblika (PR) ninia papel ne’e la’os atu halo papel ne’ebé maka hakerek de’it iha konstituisaun República Democratica de Timor-Leste, maibé atu preokupa mós ho situasaun ne’ebé maka akontese iha rai laran no rai liur ninian.

“Ita kuandu sai Prezidenti Repúblika ne’e la’os atu ba tuur de’it iha Palasiu Prezidenti Repúblika Aitarak Laran, hodi halo papel ida ne’ebé maka tau de’it iha konstituisaun, maibé sai Prezidenti Repúblika hodi bele preokupa ba situasaun tomak rai laran no rai liur ninian,” kandidatu PR, Antonio da Conceição Kalohan liu husi ninia diskursu iha kampaña ba dala sanulu, iha Tasi-Tolu-Díli, Kinta (16-03-2017).

Nia esplika katak, hanesan iha rai laran ninian populasaun barak maka sei hela iha foho no sertamente sira rasik buka hela sira ninia moris, sertamente Governu mós labele fó han ema hotu-hotu no maibé Governu tenki halo sensibilizasaun ba populasaun sira atu bele partisipa aktivu no proaktivu iha prosesu dezenvolvimentu nasaun ninian.

“Ha’u nia programa ida maka atu haforti instituisaun Estadu ninian tomak, hahú husi PR, Parlamentu Nasional, Governu, tribunal, instituisaun defeza no seguransa ninian atu dezempeña ninia papel hanesan Xefi Estadu, ida ne’ebé maka atu unifika povu no unifika unidade nasional iha Timor-Leste, hodi defende interese nasional hanesan ita nia problema fronteira maritima,” dehan kandidatu ho númeru walu (8) ne’e.

Antonio da Conceição akresenta katak, sai PR ne’e mós atu preokupa problema global mundial ninian, relasaun politikas ne’ebé maka iha labele sai hanesan bareira ho nasaun sira seluk bainhira Timor-Leste iha problema ruma ho nasaun sira, hanesan Timor-Leste ho paiz Indonesia, America, Australia, Portugal, ONU, ASEAN no organizasaun internasional sira seluk.

“Entaun ita tenki iha politika ida ne’ebé maka diak no promosaun ne’ebé maka diak ho Indonesia no Australia ne’ebé maka sai hanesan ita nia vijiñu, nasaun sira seluk no organizasaun internasional sira seluk hodi ita bele kontinua asegura ita nia amizade no relasaun diak ho sira, karik susar ruma kona ita bele kompleta malu,” realsa Kalohan.

Tuir observasaun JN-Diário iha terenu nota katak kampaña ba dala 10 kandidatura PR ho númeru sorteiu walu (8), António da Conceição ninian iha Tasi Tolu-Díli ne’e wainhira kandidatu to’o iha fatin kampaña ninian simu husi drum band São Miguel Arcanjo, no mós kampaña refere hetan partisipasaun máximu husi militantes PD, no mós militantes husi partidu hirak ne’ebé maka fó apoiu ba Kalohan kuaze rihun resin.ves

Be Sociable, Share!