Eleitu ba PR, Lu-Olo sei koopera ho Governu halakon KKN

Eleitu ba PR, Lu-Olo sei koopera ho Governu halakon KKN

posted: Friday, March 17, 2017 | 0 comments | 285 Views

Kandidatu Prezidenti Repúblika (KAPRES), Francisco Guterres Lu-Olo promete katak, bainhira nia eleitu ba Prezidenti Repúblika, nia sei koopera ho Governu atu halakon tiha Korupsaun, Koluzaun no Nepotismu (KKN), tanba korupsaun ne’e hamate ema seluk nia direitu.

“Eleitu ba Prezidenti Repúblika, ha’u sei hateten no halo kooperasaun ho Governu atu halakon buat ida Nepotismu, halakon buat ida KKN ne’e, atu ema ida labele hatama osan povu nian ba nia bolsu hodi goza ba nia an rasik. Prezidenti sei servisu hamutuk ho Governu atu oinsa bele taka dalan ba buat ida naran korupsaun ne’e,” dehan Lu-Olo ba nia militantes no apoiante sira iha Atauro, liu husi nia kampaña Prezidensial ba dala 12, Kinta (16/03).

Kandidatu PR Lu-Olo hatutan, to’o agora mós, ema balu hiit sira nia mapa bo’ot hodi lori ba Ministériu Agrikultura no Peska atu husu projetu tun sa’e.

“Maibé Lu-Olo to’o agora laiha projetu, tanba Lu-Olo lakohi atu hetan fali pursentu husi projetu sira ne’e,” katak Lu-Olo.

Nia esklarese, tinan 10 nia laran,  Lu-Olo la kaer ukun,Lu-Olo hatama tiha ba gabeta laran, maibé agora Lu-Olo hader fila fali atu hamutuk lori rai no povu ida ne’e ba oin.

“Atauro kuandu moras atu tula ba Dili, susar tebes tanba tula iha ró ki’ik oan de’it,  aimoruk mós laiha, ba to’o Dili, mate tiha, nia maluk sira mak hulan tiha ba tau iha tasi ibun hodi tula ba ró mak mai fali Atauro. Dalaruma makina kona ba peska ninian, atu mai hodi fahe ba peskador sira, maibé to’o mai iha Atauro, sira fihir oin hodi fahe ba sira nia maluk sira, Atauro oan sira lahetan,” lamenta Lu-Olo.

Nia haktuir, dalabarak mós eletrisidade iha Atauro mate bebeik, maibé laiha ema ida atu preokupa ho povu Atauro nia problema ne’e.

“Hau mak preokupa hodi telefone tuun sa’e atu haruka ema mai hadia eletrisidade ba povu. Tanba ne’e, Governu tuir mai, tenki Governu ida ne’ebé mak forte atu servisu ho Lu-Olo atu haree buat sira ne’e hotu,” katak Lu-Olo.

KAPRES ho númeru sorteiu 2  ne’e dehan, nia sei la tau nia kanuru tohar ba ezekutivu nia servisu, tanba orgaun ida-ida iha nia programa no nia politika rasik ba povu nia iha rai ida ne’e, orgaun seluk labele taka dalan ba orgaun seluk.

Prezidenti Partidu FRETILIN ne’e afirma,  bainhira eleitu ba Prezidenti Repúblika, nia sei luta ba igualdade sosial ekonomia katak, povu kiik nia oan matenek, Governu tenki tau matan, no tenki hetan bolsa estudu atu ba eskola iha liur.

“Tanba saida mak ema bo’ot nia oan sira mak tenki hetan de’it bolsa estudu, maske  nia valor ki’ik, maibé povu nia oan valor bo’ot, lahetan bolsa estudu,” kestiona Lu-Olo.

Nia salienta, Estadu tenki fó oportunidade ba povu kiik nia oan sira atu hakat ba oin, tanba povu mak fó poder ne’e ba sira atu ba kaer ukun.

Lu-Olo dehan, nia senti orgullu tebes, hodi hakat ba hamutuk ho povu Atauro, atu hamutuk lori nia ba Palácio Aitarak laran hodi sai Prezidenti Repúblika ba povu tomak.

“Ha’u nia kandidatura ida ne’e monu iha situasaun ida ne’ebé lahanesan ho tempu kotuk, tanba  bainhira ha’u anunsia ha’u nia kandidatura, ema balu husu ba ha’u katak, ita bo’ot nia kandidatura hetan apoiu husi Xanana Gusmão, ita bo’ot sei bele manan ka la’e?,”.

Lu-Olo esplika, iha momentu ne’eba nia hatete ba ema sira ne’e katak, agora dada’uk laloran tasi mós tu’un ona, udan bo’ot mós para ona, entaun nia sei bele ba to’o fatin ne’ebé nia hakarak atu to’o.

“Ida ne’e signifika katak, ita hakuak malu ema ida de’it hodi hakat ba Palácio Prezidenti Repúblika. Ha’u sei kaer hamutuk bibi oan sira hodi tau hamutuk iha luhan ida de’it, ha’u sei sai Prezidenti ba povu tomak,” relata Lu-Olo.

Nia hatutan, nu’udar kandidatu ba Prezidenti Repúblika, nia hakarak atu hateten de’it ba povu tomak, oli-liu sira iha Atauro katak, Atauro rai ida ki’ik, maibé bele loke dezenvolvimentu iha ne’eba, atu aban bainrua bele moris hakmatek.

“Ha’u la dehan ida ne’e para Atauro oan sira vota ba ha’u, maibé polítika kona ba Atauro iha tiha ona. Imi sei hetan desportu, imi sei hetan servisu, no imi sei hetan estudu no imi sei hetan buat hotu,” afirma Lu-Olo.

 Maibé KAPRES ho númeru sorteiru 2 ne’e dehan,  ida ne’e la’os Prezidenti Repúblika nia kna’ar atu halo dezenvlvimentu, maibé Governu mak sei hala’o kna’ar ida ne’e, Prezidenti Repúblika koopera de’it ho Governu atu bele realiza duni.

Lu-Olo hatutan, Prezidenti Repúblika  hatene atu halibur povu ida ne’e, nia labele hakuak lorosae, de’it no haluha tiha loromonu. Prezidenti Repúblika ida mak ko’alia lorosa’e no loromonu, nia lamerese atu sai Xefi Estadu.

“Kandidatu Prezidenti Repúblika balu hodi relijiaun nia naran atu halo ezersiu politika ba sira nia militantes sira katak, tenki sarani sira tenki vota ba sira nia kandidatu, tanba nia sarani katolika. Lu-Olo la halo diskriminasaun ida ba povu ho sira nia relijiaun,” katak Lu-Olo.

Nia hatutan, hanesan Prezidenti Repúblika, Lu-Olo sei hakruk ba konstituisaun ho lei sira iha Timor Leste, tanba povu nia lian mak deside nai ulun sira atu sai ukun na’in.

Lu-Olo afirma, Prezidenti Repúblika sei haknar-an hanesan Xefi Estadu ida atu kumpri de’it saida mak konstituisaun haruka. Prezidenti Repúblika labele hala’o nia kna’ar tuir nia vontade rasik, tanba kuandu Prezidenti  ida hala’o buat hotu tuir nia vontade, sei kria instabilidade.

“Ha’u husu ba Atauro oan sira atu vota ha’u hodi sai Prezidenti Repúblika  ba povu tomak. Prezidenti Repúblika la’os atu halo lei maibé Prezidenti Repúblika promuloga lei ne’ebé mak Parlamentu Nasionál halo. Lei ne’e sei berlaku, bainhira Prezidenti Repúblika promulga, kuandu Xefi Estadu la promulga, lei ne’e la bale,” tenik Lu-Olo.

Nia esklarese, bainhira eleitu ba Prezidenti Repúblika, Lu-Olo sei sei la halo tátika oin-oin ba lei sira ne’ebé mak Parlamentu halo, tanba kuandu lei laiha, dezenvolvimentu la la’o, Governu nia servisu mós lala’o.

Prezidenti Repúblika  sei la kontra maioria iha Parlamentu Nasionál, maibé la signifika katak, Prezidenti tenki halo tuir maioria iha Parlamento Nasionál nia vontade. Kuandu lei ne’e kontra povu nia intrese, Lu-Olo sei labele promulga, maibé haruka fali ba Parlamentu Nasionál atu hadia.

Prezidenti Repúblika mós sei hateten nafaitn ba Governu katak, eskola ne’ebé mak agora dada’uk iha fatin balu, laiha karteira, labarik sira tu’ur iha rai de’it mak hakerek, professor sira laiha meja no Almari, tanba  Prezidenti Repúblika mak bele influensia Governu atu halo ida ne’e.

Alende ne’e, Lu-Olo mós dehan, problema veteranus ne’e, realmente sai ona problema nasionál. Tanba ne’e, Lu-Olo dehan, bainhira nia eleitu ba Prezidenti Repúblika, nia sei servisu hamutuk ho Governu atu bele tau matan ba veteranu sira, hodi bele fó dignidade ba veteranu sira.

“Katak, veteranu sira tenki kria uma kain rasik, Konsellu Nasionál dos Kombatentes Libertasaun Nasionál, orgaun ida ne’ebé sei harii liu husi dekreitu lei Governu nian, atu nune’e halibur fila fali veteranu sira, oinsa veteranu sira bele presta nafatin sira nia servisu ba rai ida ne’e,” dehan Lu-Olo.

Tanba ne’e, Lu-Olo fó mensagen ba veteranu sira katak, tempu to’o ona atu veteranu sira hamutuk, tanba tuir Lu-Olo nia haree, durante tinan 15 ne’e, veteranu sira la unidade.

“Buat ne’ebé mak uluk ita hamutuk iha ailaran, hodi bele kuda hamutuk iha ita nia fuan, lori mai to’o iha ne’e, iha tempu demokrásia ita fahe malu, entaun tempu to’o ona atu ita bele hamutuk. Ha’u bele hateten tan dala ida tan katak, liu husi ha’u nia Prezidenti Repúblika eleitu, ha’u sei halibur fila fali ha’u nia kompañeiru sira jerasaun tuan ne’e, atu nune’e, ami katuas sira bele servisu hamutuk hodi nune’e, jerasaun tuir mai bele hatutan no la’o ho di’ak,” katak Lu-Olo.

Nune’e mós, Vise Prezidenti FRETILIN, Aniceto Guterres hateten katak, lia fuan ida Prezidenti ba povu tomak ne’e, tema principal ida ba Lu-Olo tanba bainhira nia sai Prezidenti Repúblika, nia sei halibur povu tomak iha TL atu sai bibi atan ida ne’ebé atu halibur no hakuak povu TL tomak husi lorosa’e to’o loro monu.

Nia hatutan, Lu-Olo sei halibur povu hotu atu hametin paz no estabilidade hodi fó dalan ba dezenvolvimentu nasionál.

“Ita Timor tomak kunese Lu-Olo hanesan veteranus ida ne’ebé funu durante tinan 24 hodi liberta povu no rai ida ne’e,” katak Aniceto.

Nia hatutan, FRETILIN hela iha opozisaun husi 2007 to’o ohin loron, Lu-Olo la assume kargu ruma iha Estadu nia laran, maibé Lu-Olo kaer kargu Estadu nian barak.

Aniceto afirma, husi esperensia luta no esperensia kaer kargu Estadu nian  hanesan Prezidenti  Parlamentu Nasionál no seluk tan, Lu-Olo servisu toman ona ho oinsa trata asuntu Estadu nian.

“Ita halo komprasaun ho kandidatusira seluk, Lu-Olo ita bele dehan, nia kandidatu ida ne’ebé prepradu no iha kapasidade naton atu sai Prezidenti Repúblika. Ita laiha tan duvida ba Lu-Olo atu sai Prezidenti Repúblika, tanba agora  ita iha postura polítika foun,  entaun Lu-Olo sei eleitu iha primeira volta,” dehan Aniceto.cos

Be Sociable, Share!