CNRT apela ba militantes vota ba KAPRES númeru 2

CNRT apela ba militantes vota ba KAPRES númeru 2

posted: Friday, March 17, 2017 | 0 comments | 223 Views

Sekretariu Jerál Partidu CNRT, Kinta (16/03/2017) apela ba kuadrus, militantes no simpatizantes partidu nian, atu vota Kandidatu Prezidenti Repúblika (KAPRES) númeru 2, Francisco Guterres ‘Lu-Olo’ iha eleisaun 20 de Marsu 2017.

Kuadrus, militantes no simpatizantes tenke vota ba Lu-Olo, nebe Prezidenti Partidu CNRT Kayrala Xanana Gusmão nia alin no Xanana fó ona apoiu ba nia (Lu-Olo).

“Komisaun polítika nasional hamutuk ho komisaun diretiva nasional partidu CNRT nian, ho respeitu tomak hakarak hato’o ba hotu-hotu katak, liu-liu partidu CNRT nia estruturu, kuadrus, militantes, simpatizantes partidu nian tomak no Timoroan nebe subkreve ba konsiderasaun nebe temi iha leten atu iha loron 20 fulan Marsu 2017 mobiliza no la’o tuir maun Xanana nia desizaun hodi vota ba nia alin kandidatu númeru 2 Lu-Olo,” apela Dionisio Babo iha Sede nasional Partidu CNRT, Bairu dos Grilhos, Kinta (16/03/2017).

Dionisio Babo hatutan katak, hafoin tetu no akompaña prosesu tomak durante loron 14 nia laran no analiza matéria kampaña nebe kandidatu sira hato’o hatur mós interese nasional, kestaun unidade nasional. Prosesu nebe maun Kayrala Xanana Gusmão nudar Prezidenti partidu ne’e rasik halao’o nu’udar negosiasaun fronteira marítima, hanoin mos metas nebe tenki prosede atu atinji tuir planu estratéjiku dezenvolvimentu 2010-2030, no prosesu tomak nebe sei hala’o ho faze nebe tenki konsidera didiak ho forma pásifika no tetu mos desizaun pesoal maun Xanana nian hodi apoia kandidatu numeru 2 Francisco Guterres Lu-Olo nu’udar Prezidenti ba periodu 2017-2022.

“Pozisaun partidu CNRT nian formalmente endorsa pozisaun maun Xanana nian atu vota ba kandidatu númeru 2, ho konfiansa tomak ida ne’e garante partidu CNRT hamutuk ho membru sira hotu garante katak kandidatu numeru 2 sei manan ho rezultadu nebe di’ak tebes, konfiansa partidu nian maka sei lahakat ba segundu ronde,” dehan Dionisio Babo.

Dionisio Babo mós hato’o parabéns ba povu Timor Leste tomak ba antusiasmu nebe hatudu ho forma demokrátiku husi loron hahu kampaña to’o ohin loron.

“Susesu no orgollu ba kandidatu nain 8 nebe oferese sira nia-an atu servi nasaun nu’udar Presidenti Republika ba periodu 2017-2022. Apresia mós ba militantes no simpatizante sira hotu no povu tomak ba prosesu kampaña to’o ohin loron”, dehan Dionisio.nes

Be Sociable, Share!