Amorin husu simpatizantes vota ho fuan

Amorin husu simpatizantes vota ho fuan

posted: Friday, March 17, 2017 | 0 comments | 246 Views

Kandidatu Prezidenti Repúblika (KPARES), númeru sorteiu  ba periodu 2017-2022, 3, Amorin Vieira, apela ba apoiantes, militantes no simpatizante sira, atu vota ho fuan iha loron eleisaun Prezidensial 20 Marsu 2017, hodi Prezidenti nebe lós.

“Ha’u nia mensajen ba simpatizantes iha Timor laran tomak mak ne’e, iha loron 20 agora, ba vota karik, tenki hanoin didi’ak antes atu foti desizaun ruma iha imi nia fuan no ba povu Timor tomak katak tenki foti desizaun tuir hanoin no fuan ne’ebé lós,” hatete Amorin Vieira, ba jornalista sira iha nia hela fatin, Beto, Comoro, Díli, Kinta (16/3).

KAPRES ho númeru sorteiu 3 ne’e haklaken katak, rezultadu iha eleisaun ne’e atu lakon ka manan nia prontu simu rezultadu ne’ebe mak povu Timor laran tomak desidi.

“Ba ha’u lakon ka manan ha’u no ita hotu tenki preparadu simu rezultadu ida ne’e, tanba buat balun akontese ita la espera. Tanba ita haree iha Estadus Unidos Amerika ne’eba, ema hotu-hotu la gosta Donald Trumb atu sai Prezidenti, ema hotu-hotu hakarak Hilary Clinton mak manan. I ha’u hanoin iha Timor mos nune’e simpatezantes sira hakarak Hilary Clinton mak manan maibé realidade hanesan ne’e, nune’e ha’u husu ita hotu preparadu atu simu realidade ida ne’e tanba Maromak nia hakarak ne’e oin seluk,” hatete Amorin Vieira.

Wainhira husu kona ba fiskais kandidatu ninian atu koloka iha sentru votasaun sira, preparadu hotu ona, sira hetan ona kartaun ne’ebé fó sai husi  Sekretariu  Tekniku Administrasaun Eleitoral (STAE), maibe nia totalidade ne’e kandidatu ladun hatene total hira, nia ekipa susesu sira, maibé sira nia ekipa kobre hotu Munisípiu 13 no tama mós to’o Suku sira .

Nune’e konfirma fali ba ekipa susesu kandidatu Prezidenti Amorin Vieira ninian, Serafim Alburqueque liu husi telefoni hatete, tuir lista fiskais ne’ebé STAE husu kada kandidatu koloka ba fatin votasaun 900 resin.

“Ne’e kada fatin votasaun, ema nain rua. Nune’e, total fiskais kada kandidatu ida tenki koloka nia fiskais hamutuk 1800 resin. Maibé ami la to’o iha númeru ida ne’e tanba problema ne’ebe ami hasoru maka rekoella fotokopia kartaun eleitoral no foto koloridu fiskais nian, nune’e numeru ne’ebé ami hetan ne’e iha deit fiskais 402. Ida ne’e maka sei koloka ba fatin votasaun sira 13 Munisípiu no mós Suku sira ne’e”, dehan Serafim Alburqueque.des

Be Sociable, Share!