Profile Antonio da Conceição ‘Kalohan’ Tane as prinsipiu jerasaun tuan hodi liberta patria no povu

Profile Antonio da Conceição ‘Kalohan’ Tane as prinsipiu jerasaun tuan hodi liberta patria no povu

posted: Wednesday, March 15, 2017 | 0 comments | 525 Views

Hela loron tolu (3), kandidatu Prezidenti Repúblika remata sira nia kampaña programa hodi ganha povu nia konfiansa hodi sai ba prezidenti Timor-Leste ba dala neen.

Kandidatu nain walu (8) ne’ebe tun ona ba terrenu hodi hasoru povu ne’e, ida-idak ho ninia kapasidade, abilidade, intelektual no esperensia iha envolvimentu vida politika.

Kandidatu Prezidente Repúblika ba periodu 2017-2022 ho numeru sorteiu walu (8) nudar kandidatu husi segundu jerasaun rezistensia ne’ebe sei kontinua tane ás prinsipiu jerasaun tuan ninian katak liberta patria e povo, no tane ás mós justisa, igualdade direitu no dever iha nasaun joven Timor-Leste, nia maka António da Conceição “Kalohan”.

Nudar joven ida ne’ebe hala’o klandestina hamutuk ho lider nasional sira, nia prontu no preparadu atu konkore no kompete iha eleisaun prezidensial ne’ebe sei hala’o iha loron 20 fulan Marsu tinan 2017.

António da Conceição moris iha suku Leorema, postu Administrativu Bazartete, munisípiu Liquiça, iha loron 8, fulan Outubru 1964, husi aman Tobias Manuel Lobato (matebian) no Inan Adelaide Sarmento (Matebian), ninia estatu hanesan kaben nain ho Iria de Fátima Neves Camões, moris iha Lospalos, oan husi Luis de Camões no Rosentina Neves de Camões.

Hahú tama eskola iha Ensino Primario Colégio Infante de Sagres Maliana, iha Tinan 1970-1975 no hasai 4aClasse. Hafoin revolusaun ne’ebé mós hamosu funu, António da Conceição halai ba ai-laran ho família durante tinan tolu (3) hahú husi tinan 1975 to’o 1978, nia hetan kapturasaun hamutuk ho família iha fulan Juñu 1978 iha suku Leorema no tama iha kampu detensaun iha postu Bazartete hahú husi tinan 1978 to’o tinan 1981.

Iha tinan 1982 to’o 1987 nia tama eskola iha Seminário de Nossa Senhora de Fátima Lahane no frekuenta eskola iha Externato de São José Balide no hasai 70 ano ho eskola Lian Português, únika eskola ne’ebé sei hanorin ho lian Portugues.

Iha tinan 1987 to’o 1991 nia estuda filosofia no Teologia iha Seminário Maior Malang, Indonesia, no iha tinan 2003 to’o 2005 nia kontinua fali estudu iha “Lancaster University”, Inglaterra no hasa’i Mestradu iha Relações Internacionais e Estudos Estratégicos.

Konabá vida polítika ninian nia asosia an ho organizasaun Resistensia Nacional dos Estudantes de Timor-Leste (RENETIL) ne’ebé lidera husi Fernando La Sama de Araújo, nia rasik hala’o responsabilidade nuudar Sekretario Região Malang hodi lidera movimentu estudantes ba prosesu ukun rasik an iha Malang-Indonesia, husi tinan 1987 to’o tinan 1991, iha 1991 nia simu mandatu husi RENETIL atu fila mai Timor hodi hamutuk reforsa servisu movimentu klandestina nian iha rai laran, hodi reforsa servisu klandestina direitamente, hahú husi tinan 1991 to’o referendum 1999 wainhira Timor oan hakotu atu hamriik mesak nuudar nasaun independente no soberanu. Tuir fali iha tinan 1991 to’o 1999 hala’o knaar reprejenta RENETIL iha Timor-Leste hodi servisu hamutuk ho SABALAE, maun David Dias, maun Ete Uku no lideransa sira seluk husi reziaun IV ninian.

Hafoin hetan libertasaun iha tinan 1999, António da Conceição hamutuk ho ninia kompañeru lubun hahú loke diskusaun hodi hari’i  Partido Democratico (PD), ne’ebé hamriik ofisialmente iha loron 10 juñu 2001. Kargu ikus ne’ebé nia asumi iha Partido Democratico (PD) nia estrutura maka nuudar Prezidente Konsellu Polítiku Nasional to’o ohin loron.

Ninia experiensia servisu agora dau-daun kaer kargu iha VI Governu konstitusional nuudar Ministro Estado Koordenador Assuntos Sociais no Ministro Edukasaun. Kargu ida ne’e simu liu husi desijaun Prezidente partidu CNRT, Kayrala Xanana Gusmão no aseitasaun Primeiru Ministru ninian no hahú iha loron 10, fulan Agostu, tinan 2015 to’o ohin loron, hodi troka Fernando La Sama de Araújo (matebian) ne’ebé mate iha misaun servisu iha loron 2, fulan Juñu, tinan 2015.

Molok nia simu knaar nuudar Ministro Estado Koordenador Assuntos Sociais no Ministro da Educação, António da Conceição liu husi eleisaun jeral 2012 eleitu nuudar deputadu Partido Democratico (PD) ninian no bainhira forma V Governu konstitusional nia hetan fiar hodi kaer pasta nuudar Ministro Comerçio e Industria, kargu ida ne’e hahú kaer husi fulan Agusto 2012 to’o fulan Agusto tinan 2015.

Iha Governu tranzisaun ne’ebé lidera husi Dotor Sérgio Vieira de Melo (matebian), António da Conceição hetan mós fiar hodi tama iha Governu nuudar asesor ba Ministru Xefi Dotor Mari Alkatiri, hodi servisu iha Comição de plano, hodi dezenvolve Plano Estratégico de Desenvolvimento Nasional dahuluk.

Iha IV Governu konstitusional, António da Conceição hala’o knaar iha Ministerio da Justiça nuudar Asesor husi tinan 2008 to’o 2010, hafoin remata kontratu hala’o hikas knaar iha Ministerio das Financas nuudar Asesor.

António da Conceição mós nuudar funsionariu Ministerio dos Negocios Estrangeiros ho grau B ativu no agora dau-daun ne’e hola hela lisensa espesial seim vensimentu nuudar funsionariu atu hala’o knaar polítiku nuudar membru Governu iha V no VI Governu Konstitusional.

Nia iha mós experiensia servisu tinan barak ho Organizasaun Naun Governamental (ONG) nasional no internasional hanesan ETADEP, Timor-Aid, BELUN no CARE International no mós servisu iha ajensia Internasional nasaun Canada nian  CIDA, nasaun America ninian USAID no nasaun Australia ninia maka AUSAID.

Ninia koñesimentu konabá lian ninian maka, lian materna Mambae no bele koalia no hakerek diak iha lian Portugues, lian Inglês, lianTetum no lian Bahasa Indonesia.Albito Alves

Be Sociable, Share!