Lu-Olo promete sei defende rikusoin no intrese publiku

Lu-Olo promete sei defende rikusoin no intrese publiku

posted: Wednesday, March 15, 2017 | 0 comments | 254 Views

Kandidatu Presidenti Repúblika (KAPRES), Francisco Guterres ‘Lu-Olo’, iha ninia kampaña iha Munisipiu Baucau, Domingo liu ba,  promete katak, nia mak eleitu ba Prezidenti Repúblika sei defende bebeik rikusoin no intrese púbiku, tuir legalidade konstitusionál, direitus no liberdade valores demokrátikus ne’ebé ema hotu hadomi iha mundu.

KAPRES ho númeru sorteiu 2 ne’e hatutan, nia deside atu  kandidata-an tan ba Prezidenti Repúblika, la’os deit prosesu konsturusaun Estadu Direitu Demokratiku, maibé atu sai servidor di’ak liu.

“Ha’u hakarak ko’alia deit mak ne’e, sidadaun kuandu vota sala, ita terus nafatin hanesan ne’e, tanba kuandu vota sala, ita nia votu ne’e la vale,” relata Lu-Olo.

Nia esplika, Konstituisaun hateten katak, soberania iha povu nia liman.  TL la defende ba sistema ekonomia merkadu sentaralizadu, maibé depende ba sistema ekonómia merkadu.

Nia hakatuir, principal liu mak orgaun poder polítiku ida ne’e atu halo ezersiu ukun tuir lei.

“Lu-Olo atu mai hamrik iha imi nia oin sai kandidatu ba Prezidenti Repúblika, atu husu legimitidade povu nian atu bele sai Prezidenti Repúblika ba povu tomak iha Timor Leste,” salienta Lu-Olo.

KAPRES ho númeru sorteiu 2 ne’e afirma, KAPRES balu hateten hodi promete ba povu katak, bainhira sira mak manan ka eleitu ba Prezidenti Repúblika, sira tenki lori lei sira ne’e ba diskuti lai ho povu atu lei sira ne’e sah ka lae.

Lu-Olo dehan, nia sei la halo hanesan ne’e, kuandu hatudu hanesan ne’e, la’os Presidenti Repúblika ida ne’ebé di’ak ba nasaun.

Nia esklarese, Presidenti Repúblika bele deriji mensazen ba povu tomak iha PN, tanba so Prezidenti Repúblika nia lian mak todan ba povu tomak atu povu hotu bele hakmatek,hodi nune’e, povu bele iha esperansa katak, iha probelema ruma bele resolve ho ulun malirin.

“Sei ita halo kontrariu, sira iha karaik halai namkari arbiru, tanba ita iha esperensia iha 2006. Tanba ne’e ita tenki kuidadu ho ita nia lia fuan sira ne’e, tanba ita nia lia fuan kroat,” dehan Lu-Olo.

Prezidenti Partidu FRETILIN ne’e relata, povu mak  fó nia votu ba ukun na’in sira  atu ba ukun. Entaun kuandu ukun ne’e sala, klaru povu tenki ko’alia, maibé mak tenki la’o tuir nia dalan.

Lu-Olo dehan, PR la tenki ba komanda fali Governu kona ba dezenvolvimentu nian katak, dezenvolvimentu tenki halo husi Aldeia mak ba Suku, husi Suku mak ba Munisipiu, ida ne’e lalos.

“Hau fiar iha tinan 2017, prosesu sei foun fali, prosesu la’os atu hit ami nai ulun sira, maibé prosesu atu hi’it povu ida ne’e sai husi kiak no mukit,” tenik Lu-Olo.

Eis Presidente Parlamento iha primeiru lejislativa nee salienta katak, iha KAPRES balu kontinua soe rai rahun ba povu nia maten hodi hateten katak, bainhira sira mak eleitu ba Xefi Estadu, nia sei fó prioridade ba edukasaun, saúde no área seluk tan.

“Kaer edukasaun, edukasaun hakdasak tiha ona, agora ba promete fali ba povu katak, nia eleitu ba Presidenti Repúblika sei hadia edukasaun. Agora ita kaer hela Ministru Edukasaun  ita nia kurikulu, tinan tinan muda tu’un sa’e ona, agora ba promete fali dehan, atu sa’e ba Prezidenti Repúblika mak hadia edukasaun, ida ne’e lalos, tanba ne’e la’os Prezidenti Repúblika nia kompetensia,” katak Lu-Olo..

Veterano FALINTIL nee mos dehan, Timor Leste  mós atu tama ona ASEAN. Tanba ne’e, Lu-Olo promete katak, nia sei estuda didi’ak hamutuk ho Governu, atu Timor Leste nia adezaun ne’e, bele susesu.

Lu-Olo haktuir, nia sei la halo diskriminasaun entre rasa, koor ka relijiaun, tanba Lu-Olo sai Presidenti Repúblika ba povu tomak.

Lu-Olo mós relata, problema social barak los, entaun Lu-Olo sei promove mós dialogu hodi ko’alia ho organizasoens sira seluk kona ba lala’ok dezenvovimentu iha Timor Leste .

Lu-Olo sei defende mos independensia tribunal sira nian, no Lu-Olo sei koa’lia bon Governu atu oinsa mak bele investe nafatin iha setro justisa atu sira bele tetu justisa ba povu ida ne’e ho diak no los.

“Ha’u sei garante unidade Estadu nian, ho nia karakter unidade, iha repúblika demokrátika Timor Leste nian, laiha parte ida atu separa husi rai ida ne’e, Timor Leste rai ida de’it, povu ida de’it, no hakarak ida de’it i hanoin ida de’it,” katak Lu-Olo.

Nia haktuir, objetivu ida ne’e, mak Lu-Olo sei sai Prezidenti karik, sei asegura no kaer metin nafatin iha nasaun ida ne’e.

Lu-Olo dehan, nia sei respeita orgaun Estadu sira seluk, signifika katak, bainhira Lu-Olo sai Prezidenti Repúblika, nia sei reprezenta Estadu total, maibé Lu-Olo sei la inkarna Estadu insinhus.

Prezidenti Partidu FRETILIN ne’e afirma, intrese bo’ot nasaun nian, liu ema ida-ida nia intrese. Lu-Olo esklarese, bainhira eleitu sai Prezidenti Repúblika, nia sei rona sidadaun hot-hotu nia hakarak kona ba intrese nasionál husi rai laran no rai liur, oinsa mak atu konjuga no kaer metin, para soberania Timor Leste ne’e bele metin.

Lu-Olo dehan, nia sei halo kooperasaun ho orgaun soberania sira seluk, para Prezidenti Repúblika tama husi sira hodi ko’alia, tanba Prezidenti Repúblika la’os orgaun ida ne’ebé Governa, maibé orgaun ezekutivu mak bele Governa.

Lu-Olo hatutan, nia sei fó nia-an tomak atu haburas relasaun di’ak ho rai hot-hotu, no halo Timor Leste ponte ne’ebé liga pasífiku ho Asia, no hatene uza fronteira istórika no cultural, atu loke dalan ba tama iha Afrika, Europa no America, liu husi CPLP.

“Lu-Olo hanoin tiha ona atu, oinsa mak tau ita nia forsa iha rai ida ki’ik oan hanesan Timor Leste. Ema balu hanoin katak, Timor Leste la presiza forsa, maibé Lu-Olo hanoin katak, Timor Leste maske ki’ik, maibé nia tenki iha forsa ida, atu atende ba situasaun polítika geo estratejika Timor Leste nian, ne’ebé rai pedasuk ida sikat iha sorin, ne’ebé halo fronteira ho Indonesia,” relata Lu-Olo.

Nia haktuir, forsa ne’e iha atu bele hatudu sinal, signifika katak, F-FDTL nia iha misaun bo’ot ida atu bele halo defeza ba Timor Leste nia patria. Lu-Olo sei buka hatene ho orgaun ezekutivu, li-liu ministériu ne’ebé mak kaer área defeza ninian, li-liu polítika institusionál ba área defeza nian ne’e mak saida.

Lu-Olo afirma, forsa ne’ebé mak Timor Leste iha, presiza haburas relasaun externa no relasaun no boa viziñansa ho rai viziñu sira ne’ebé besik liu, no relasaun ho mundu, partikularmente relasaun ho nasaun membru CPLP sira.

Kandidatu Presidenti Repúblika (KAPRES), Francisco Guterres ‘Lu-Olo’ mos hatete katak, nia kandidatura ba Prezidenti Repúblika ne’e, loke ona dalan ba lideransa jerasaun tuan sira atu unidade iha eleisaun Parlamentar.

“Lu-Olo nia kandidatu ida ne’e, loke ona dalan ba eleisaun Parlamentar,  oinsa mak ita bele la’o hamutuk. Ami jerasaun tuan sira ne’e, atu prepara dalan ba jerasaun foun sira. Ami hamutuk atu bele hadia ukun ida ne’e para bele la’o ba oin,” dehan Lu-Olo ba nia apoiantes no simpatizantes sira iha Munisipiu Baucau.cos

Be Sociable, Share!