Entrevista eskluzivu ho KAPRES Luis Tilman: “Ha’u nia programa prioridade maka dezenvolvimentu humanu”

Entrevista eskluzivu ho KAPRES Luis Tilman: “Ha’u nia programa prioridade maka dezenvolvimentu humanu”

posted: Wednesday, March 15, 2017 | 0 comments | 140 Views

Kandidatu Prezidenti Repúblika (KAPRES), ho númeru sorteiu hitu (7), Luis Alves Tilman hateten katak, sé karik eleitu sai Prezidenti Repúblika (PR) ba periodu 2017-2022, sei fó fó prioridade ba programa dezenvolvimentu rekursus humanus, tanba rekursus humanus iha Timor Leste (TL) sei menus no fraku teb-tebes.

KAPRES nomor 7 ne’e reforsa katak, dezenvolvimentu rekursus humanus importante teb-tebes ba TL nia futuru.

Atu hatene konaba polítika, programa atu dezenvolve rekursus humanus TL nian, tuir mai ami hatun kompletu entrevista eskluzivu Jornalista Jornal Nacional Diário (JND), Yohanes Fernandes  ho KAPRES Luis Alves Tilman (LAT) foin lalais ne’e iha Díli, molok hala’o kampaña eleitorál.

JND. Saida mak motiva ita hodi kandidata-an ba PR?

LAT. To’o ona tempu povu Timor Leste motiva ha’u, haree ba buat lubuk ida maka la’o no buat lubuk ida maka seidauk la’o, klaru hanesan kandidatu ida, ha’u optimista katak ha’u tenki manan. Mas buat ida manan no lakon ne’e kompetisaun, sé manan ha’u kontinua buat balun ne’ebé ha’u mehi, sé lakon mós ha’u kontinua hanesan ema Timoroan ne’ebé iha rai ida ne’e. Atu dehan deit ha’u nia prezensa iha kandidatu Presidenti Repúblika ne’e hakarak koalia buat ida ne’ebé esensial iha ha’u nia mehi tomak ne’e iha Timor Leste. Tanba ita independénsia tinan barak ona, mas dezenvolvimentu humanu ne’e la ekilíbriu ba iha povu Timor Leste tomak, tanba ne’e mak ha’u mai ho vizaun ida povu Timor Leste tenki moris iha dezenvolvimentu humanu ne’e digñu teb-tebes, tanba ne’e maka karik ha’u eleitu ba Presidenti Republika prioridade programa maka dezenvolvimentu humanu.

JND. Ita prontu kompete iha eleisaun prezidensial ho kandidatu sira seluk?

LAT: Hanesan Timor oan ha’u prontu, tenki kandidatu. Dala ruma ema hatete dehan atu hasoru maun Lu-Olo, Jose Luis Guteres, Antonio Conceição no sira seluk ha’u prontu atu hasoru hanesan ema Timoroan ita mesak maun alin deit, aman oan deit iha Timor Leste ne’ebé ha’u hanoin laiha dúvidas para kompete ho sira.

JND. Oinsa ita bo’ot nia preparasaun ba kampaña prezidensial?

LAT. Ha’u nia preparasaun másimu tanba ha’u laiha kampaña aberta ba iha públiku, ha’u iha kampaña tama Munisípiu sai Munisípiu liu husi diálogu ho ha’u nia simpatizantes no apoiante sira. Ha’u sei tama Munisípiu hotu, karik sei iha tempu ha’u sei tama to’o Aldeia atu hatete ba sira, ha’u maka ne’e maske mai ho kapasidade limitadu ha’u hakarak kompete ba kargu ida Presidenti Republika.

JND. Prioridade programa saida mak ita bo’ot sei lori iha kampaña?

LAT. Tuir ha’u nia moto iha ne’eba, ita hakarak dezenvolve mehi husi jerasaun tuan sira tanba ne’e maka ha’u nia programa prioridade maka dezenvolvimentu humanu ema nian. Sira seluk hanesan agora ita haree atu hatete dehan durante primeiru Governo Konstitusional mai to’o sestu Governu ita dehan sasan la la’o ne’e ita inventa sasan balun mas ha’u atu hatete deit, ha’u nia prezensa ba iha Ministeriu relavante sira hanesan Eduksaun, Saude, Infrastrutura, MSS, MCIA sira ne’e maka sasan lubuk ida la’o. Mas sasan sira ne’ebé mamuk ita tenki priense halo didi’ak para dezenvolve di’ak liu tan. Ha’u hanoin laiha programa seluk ita atu produs iha país ida ne’e. Tanba programa hotu-hotu la’o, só que iha sasan balun mamuk hela, sé ita hateten dehan Estadu ne’e la halo buat ida ne’e, ita bosok. balun mamuk ne’e hanesan kasu bo’ot iha edukasaun maka merenda eskolar, oinsa maka ita buka meius atu programa merenda eskolar labele monu ba ko’ordenador eskola mak utiliza fali mas ita fó ba kompaña sira nune’e bele haree vantajen no desvatajen se fo ba ko’ordenador eskola maka sei hamosu korupsaun bo’ot iha neba.

JND. Oinsa ita bo’ot nia polítika rejional no internasional?

LAT: Ha’u hanoin politika regional klaru hanesan Timor oan hau tenki halo buat hotu kobre sosiedade tomak nia. Agora politika Internasional ita hare no sei halo relasaun bilateral ho nasaun vizinu sira inklui nasaun sira CPLP, kuandu hau eleitu ba Presidente Republika hau sei presiza peritus Timor oan sira barak nune bele kontinua sasan ne’ebé ita nia maun bo’ot sira kontinua hela, ita lahalo buat foun iha neba tanba Presidente Republika ida tun, ida sae sempre kontinuasaun ne’e iha.

JND. Prezidenti ne’e laiha osan, tanba sa ita bo’ot kandidata an no oinsa ita bo’ot nia jestaun ba servisu no familia?

LAT. Ha’u hanoin hanesan ema Timor oan ita labele koalia buat ida dehan laiha osan, iha osan ou laiha hanesan Timor oan tenki iha vontade bo’ot, hadomi rai no povu ida ne’e. ne’ebé hakarak ka lakoi kuandu hau marka presensa quer zer hau prepara an ona atu hakat ba, karik hetan lezitimidade husi povu ida ne’e.

JND. Fontes orsamentu ba kampana oinsa?

LAT. Atu hatete kandidatu ida ne’e la hanesan ho kandidatu sira seluk, ekipa susesu iha ne’e mai ho voluntario, ami laiha osamentu ida ba iha ami nia kampaña mais durante ne’e hau rasik hanesan kandidatura hatete ba kolega sira poupa ita bo’ot sira nia energia hau buka oinsa maka bele hetan finanseiru ruma para bele aslera ita nia atividade. Laiha kompañia ida, laiha politika ida husi ami nia kotuk.

JND. Knar Konstituisional Presidente de Republika nian importante maka garante unidade nasional, oinsa ita bo’ot nia visaun ba unidade nasional?

LAT. Ha’u hanoin atu hatete deit pais ida ne’e nia soberania tia ona, Presidente Republika asume kargu ne’e tenki hakuak ema hotu para ita bele hare estabilidade iha rai ida ne’e. tanba fiar katak forsa rua ne’e sei lahusik soberania ne’e monu, ita nia maun bo’ot sira hanesan Xanana, Ramos Horta, Lu-Olo, Taur, Alkatiri ema sira ne’e maka iha kematangan iha buat hirak ne’e tanba ne’e dala ruma hau mak asumi kargu ne’e mos hau fiar sira ne’e sei la husik hau.

JND. Knar Presidente nian mos hanesan Xefi Estadu de Forsas Armadas , hare ba kondisaun ne’ebé minim intermos kapsidade, rekursu, ekipamentus, oinsa maka ita bele asegura sustentabilidade Forsa Armadas?

LAT. Atu dehan ita nia forsa armadas laiha rekursu hau hare ida ne’e lalos, Forsa Armada ne’e iha rekursu ne’ebé sufsiente kestaun maka Governu tenki fasilita fasilidade halo didiak para sira rekursu bele atinji. Hau hanoin iha forsa armada ema hotu mai ho siensa balun la ho siensa, durante ne’e ita hare forsa armada nia rekursu kapa’as los. Iha individu balun maka halo buat balun ladun fo benefisio ba povu mais hau hanoin ida ne’e individu nian.

JND. Oinsa ita nia visaun ba modernizasaun forsa armada rasik?

LAT. Sé karik hau eleitu ba Presidente sei buka termos oi-oin para bele dezemvolve diak liu tan ita nia forsa armada ho ita nia Polisia Nasional Timor Leste (PNTL) ba futuru.

JND. Situasaun ne’ebé agora iha intervensaun poder ida ba poder seluk sei akontese, atu hametin pilar sira ne’e kompetensia Presidente Republika, saida maka ita sei halo para valoriza intituisaun Estadu lao diak e la perturba malu?

LAT. Atu hatete buat simples ida, ita nia lideransa labele sukat ho ita nia maun bo’ot sira, hanesan jerasaun foun sei ita ba atu kontinua obra balun ne’ebé husik hela para ita atu dezemvolve diak liu tan, hau hanoin iha futuru ne’e se deit maka sai Presidente laiha problema. Se karik hau maka eleitu instituisaun relavante iha nasaun ne’e tenki servisu hamutuk, Presidente Republika tenki hakuak Instituisaun sira hotu.

JND. Povu barak mak tau prekupasaun liu-liu kona ba lei sira, tanba dala lei ne’e vale deit ba ema ki’ik sira maibe ema bo’ot nunka kona, sera que ita bele garante?

LAT. Atu hatete hanesan ne’e Timor Leste kontekstu lei ba rai ne’e ho lei balun dehan vale ba ema ki’ik no la vale ba ema bo’ot, buat sira ne’e akontese mais ita seidauk hare nia realidade, agora iha parte balun ema koalia konaba abuzo de poder mais hau rasik seidauk iha provas ruma kona ba ida ne’e. sekarik hetan konfiansa ita tenki trata povu ne’e hanesan no dignu. Kona ba lei ba rai Governu bele hasai povu maibe persija kria kondisaun.***

Be Sociable, Share!