Eskluzivu ho kandidatu PR, Angela Freitas: “Ha’u hakarak kombate korupsaun, lori povu partisipa iha dezenvolvimentu”

Eskluzivu ho kandidatu PR, Angela Freitas: “Ha’u hakarak kombate korupsaun, lori povu partisipa iha dezenvolvimentu”

posted: Monday, March 13, 2017 | 0 comments | 136 Views

Kandidatu Prezidente Repúblika (PR), Maria Angela Freitas da Silva, promete katak, liu husi eleisaun prezidensial iha loron 20 Marsu 2017, povu fo votus konfansa sai PR, sei halo esforsu bo’ot hodi kombate korupsaun iha Timor Leste, no lori povu partisipa iha dezenvolvimentu.

Tamba tuir Kndidatu PR ba periodu tinan 2017 to’o 2022, ho numeru sorteu (6) katak, korupsaun loron ba loron ninia numeru aumenta ba bei-beik hamate prosesu dezenvolvimentu Nasaun nian, nune’e tempu ona kombate korupsaun iha rai doben ida ne’e. Atu hatene klean konaba komprimisu ne’ebe refere akompanha intervista eskluzivu Jornalista Jornal Nacional Diário (JND), Napoleão Xavier (JND), ne’ebe hala’o ho kandidatu Prezidente Republika, Maria Angela Freitas da Silva (AF) iha Xede partidu TRABALHISTA Bairo Formosa-Dili, Kuarta (22/02/2017).

JND : Saida mak motiva ita hodi kandidata a’an ba Prezidente Republika ?

AF : Saida mak movitima ha’u atu kandidata a’an ba Prezidente Republika, ha’u haree katak iha ita ninia rai ne’e injustisa bo’ot iha korupsaun, iha tinan ba tinan aumenta ba beibeik, ha’u hanoin katak ita  tenki kombate ida ne’e imediata atu nune’e ita nia rai ne’e bele sai rai  ne’ebé livre husi korupsaun, tanba korupsaun mak hamate prosesu dezenvolvimentu iha rai laran.

JND : Ita prontu ona kompete ihe eleisaun Prezidensial ho kandidatu sira seluk ?

AF: Sim, klaru que prontu ona mak ha’u atu kompete, iha optimista katak, ha’u sei manan iha eleisaun 2017, tanba tempu to’o ona Timor atu hetan inan ida atu kaer ukun, atu servi sein salariu.

JND : Oinsa ita bo’ot ninia preparasaun ba kampaña Prezidensial ?

AF: Ekipa prepara ona, ami agora dadauk ne’e hala’o dialogu aberta ho komunidade sira iha bairo-bairo, ami hein to’o loron kampanha nian iha primeira dia 3 Marsu 2017, ami komesa la’o kampanha iha Liquisa no Ermera.

JND : Programa priodade saida mak ita sei hato’o iha ita ninia kampaña rasik?

AF : Programa ne’ebeé ha’u sei foka mak kona-ba setor agrikultura ita koalia kona-ba pekuaria nomós peskas. Tanba setor tolu ne’e ita haree  importante tebes fo moris ba ita ninia povu em-jeral. Tuir fali mak edukasaun, oinsa mak ita bele kapasita ita ninia joven sira atu partisipa masimu iha dezenvovimentu ho edukasaun ne’ebé mak diak, atu nune’e ita bele kapasita ita ninia oan sira ne’ebé saudavel, atu hetan kualidade ne’ebé diak.

Iha setor saúde importante tebes, tanba ohin loron ita haree kondisaun hospital menus ekipamentu atu bele fo seguru ba pasiente sira, e mós falta de sanitasaun, ema barak mak lamenta kona-ba kondisaun hospitais, tanba laiha be mos no sanitasaun ne’ebé ke diak to’o ikus rezulta vitima barak iha hospital. Depois infraestrutura, ne’e setor imporante tebes, tanba komesa primeiru koalia agrikultura to’o mai iha setor hat ne’e iha ligasaun ida por ida. Hakarak ka lakohi tenki instala atu nune’e kondisaun ne’ebé  iha ita ninia nasaun bele la’o diak ho setor sira seluk, tanba setor agrikultuta, edukasaun, saude, infraestrutura, ita la instala diak iha nasaun ne’e, ha’u hanoin difikulta ita atu la’o to setor sira seluk.

JND : Modelu kampaña saida mak ita sei hala’o?

AF : Modelu kampaña ne’e ami uja door to door, ami lakohi sow foos, depois ami lakohi halo really atu evita vitima, tanba durante ne’e ita   kampanha Prezidensial no Parlamentar sempre iha vitima, tanba  ne’e  duni ha’u fo orientasaun ba ha’u nia ekipa sira atu bele prepara diak joventude sira voluntariu atu distribui pamfletus material kampanha ami prepara  iha nasional atu distribui ba Munisipiu nomós Suco to’o Aldeia sira.

JND : Ita bo’ot  ninia sentimentu  hasoru kandidatu PR sira seluk , karik sei sai bareira ba ita atu hakat ?

AF : Ha’u hanoin katak, laiha ameasa ida, iha kompetisaun ida ne’e tanba sira kandidatu PR nain hitu (7) mesak Timor oan de’it, ha’u mak feto iha sira ninia klaran, ne’e duni tempu ona atu sira reforsa feto ida ne’e ba Prezidente Republika.

JND : Programa prinsipal saida mak ita sei lori bainhira sai PR?

AF : Programa mak ha’u foka dadauk ohin importante mak agrikultura, oinsa mak ita bele kria kondisoins, tenki iha irigasaun diak atu nune’e fasilita ita ninia agrikultur sira atu nune bele produs sira ninia produsaun bele hasa’e kontidade ne’ebé bo’ot.

JND : Oinsa ita ninia politika rejional no internasional ?

AF : Kona-ba politika internasional ha’u hanoin katak, ita ligasaun ho internasional metin, nudar lideransa ne’ebé mak tinan hirak nia laran  involv  iha palku politika 35 anos, ha’u nia ligasaun ne’e metin, ha’u hanoin katak, oinsa mak atu hametin liu tan ligasaun diplomatiku atu nune’e bele defini kona-ba fronteira maritima, fronteira terestre nomós  fronteira aero, tanba ida ne’e mak prioridade iha ha’u ninia kandidatura.

JND : Kona-ba fontes orsamentu ba kampañia?

AF :  Durante ne’e ha’u nia kampañia door to door, ha’u uza ha’u ninia orsamentu rasik nomós ajuda husi familia sira ne’ebé bele tuir sira ninia kbi’it. Tanba  ami seidauk tama involve iha korupsaun ne’ebé ami iha osan barak para utiliza, ami utiliza osan ne’ebé tuir ami ninia kbi’it atu nune’e ami ba livre husi korupsaun, tanba ne’e duni ita labele monu ba kandidatu ne’ebé mak lori povu ninia osan sosa fali povu.***

 

Be Sociable, Share!