PM Rui: Desportu halo fiziku diak no aumenta matenek

PM Rui: Desportu halo fiziku diak no aumenta matenek

posted: Monday, February 27, 2017 | 0 comments | 263 Views

Primeiru Ministru (PM), Rui Maria de Araújo hatete, atividade desportu la’os deit atu bele aumenta fíziku halo di’ak, maibé liu husi desportu bele aumenta tan matenek ka badaen ba moris aban bainrua ninian.

“Ha’u hakarak hatete ba ita bo’ot desportista sira, prátika desportu ne’e halo didi’ak, valores ne’ebé iha desportu ida ne’e nia kotuk. Aproveita oportunidade ne’e ho didi’ak atu dezenvolve ita bo’ot sira nia-an tanba desportu ne’e ita bo’ot sira bele hetan tan matenek ka badaen ba ita nia moris aban bainrua ninian, liu-liu ba sira ne’ebé sei joven.  Ho ida ne’e ita hein katak ho liga no opotunidade ne’ebé joven sira hetan, liu-liu tanba basketbolista anteriores kria ona kondisaun. Ne’ebé ita bo’ot sira aproveita didi’ak. Ha’u hein katak ida ne’e sai mós la’os deit prátika desportu ida, maibé sai mós eskola formasaun ema ninian, karakter ema ninian, atu nune’e bele sai ema ida ne’ebé utíl, bele sai sidadaun ne’ebé di’ak liu tan hodi kontribui ba dezenvolvimentu rai ida ne’e,” hatete PM Rui, liu husi nia diskursu iha seremonia abertura ba Liga Basketbol Nasional Timor-Leste (LBNTL), ne’ebé hala’o iha Jinájiu, Díli, Sesta (24/02).

PM Rui hatete, basketbol desportu ida ne’ebé tuir buat oituan ne’ebé nia hatene, ezizi buat barak. Sé koalia ho lian tetum karik, basketbol uza liafuan ida ne’ebé moris ne’e barak, ain tenki moris, isin tenki moris, liman tenki moris, matan tenki moris i buat moris sira ne’e importante tebes hodi tiru bola ba redi labele sala.

“Kompetensia sira ne’e validu mós ba iha ita nia vida loro-loron, la’os deit ba iha desportu basket, iha ita nia vida loro-loron, hanesan ita ema serbisu karik iha institusoens publikas ka pribadas, kompetensias sira moris-moris ne’e importante tebe-tebes so ida liman lais ne’e mak labele,” Xefi Governu ne’e hatete.

Liu husi oportunidade ne’e, Xefi Governu fó parabens ba Federasaun Basketbol Timor-Leste, hafoin ba LBNTL, prezidenti klubus no mos atleta sira hotu katak, responde positivamente ba dezafiu ne’ebé Governu liu husi Sekretariu Estadu Joventude no Desportu (SEJD), hato’o ba imi hotu, atu bele organiza an.

“Ita iha Timor-Leste, iha potensial barak tebe-tebes laos deit iha area  desportu, iha area kultura no buat seluk tan, maibé sidadaun sira maka presiza organiza malu, Governu nia responsabilidade hamosu regulamentus ne’ebé presiza, kria kondisaun ne’ebé nesesariu maibé sidadaun ida-idak maka tenki responde ba dezafiu ne’ebé iha, priensia lakunas sira, ne’ebé mosu iha atividade sira ne’e nia laran. infelizmente durante  ida ne’e, sei iha lakunas barak seidauk priense hotu, oras ne’e dadauk ita iha ona liga tolu ne’ebé mosu, futebol, volleybol ho basketbol, ne’e sinal ne’ebé positivu ba ita hotu, presiza enkoraja nafatin atu modalidade desportu sira seluk mos organiza malu nafatin hodi nune’e ita labele sai sosidade ida ne’ebé organiza malu iha politiku deit, ho partidus politikus husi 20  to’o 30, maibé liga desportu tenki barak liu fali partidu politiku sira,” Rui hatete.

Ikus liu Xefi Governu ne’e mós, fó parabens ba desportista sira, tanba iha situasaun no kondisoens ida ne’ebé seidauk ideal, atu hari’i klubes, atu desportu ida ne’e bele la’o didiak, sadik imi nia an, hamriik forma klube feto no mane, hanoin resposta ida ne’e positive tebe-tebes, i sosiadade tomak iha Timor-Leste tenki louva resposta ne’ebé sira fo. No hakarak hato’o mos

Parabens Sekretariu Estadu Juventudi no Desportu (SEJD) ne’ebé mobiliza, dinamiza prosesu ne’e tomak, iha tinan rua ne’e nia laran, ne’e konsege iha atividade liga tolu, se bele dinamiza liu tan atividade desportu iha Timor-Leste.

“Ita hein katak iha periodu fulan nen ne’ebé sei restu se bele karik hamosu tan liga balun tan, hodi nune’e wainhira iha loron 08 husik hela Governu, atividade iha desportu bele dinamizadu diak liu tan. Ba ita hotu iha ne’e dalai da tan, parabens, hau hein katak lansamentu ba LNBTL nian sai tan markuida, sai tan  indikador ida ba prosesu dezenvolvimentu iha Timor-Leste, laos deit iha dezenvolvimentu fizika maibé dezenvolvimentu ne’ebé kria kondisoens atu ema Timor oan bele dezenvolve no kapasita nia an hodi partisipa diak liu tan iha dezenvolvimentu nasional iha Timor-Leste,” Nia hatete.

des

Be Sociable, Share!