PEP-KHUNTO la hakfodak ho bareira 4%

PEP-KHUNTO la hakfodak ho bareira 4%

posted: Thursday, February 16, 2017 | 0 comments | 361 Views

Partido Esperança da Patria (PEP) ho Partidu Kmanek Haburas Unidade Timor oan (KHUNTO)  senti la hakfodak ho lei eleitoral konaba bareira 4% ba partido Politiku sira tama Parlamento Nasional.

Alterasaun lei númeru 3/2004 kona ba eleisaun Parlamentar ne’ebé aprova ona iha Parlamentu Nasional (PN), katak Partidu Politiku (Parpol) ne’ebé atu hetan asentu iha PN tenki hakat liu bareira 4%.

Sekretáriu Jeral PEP, Antoninho Batista Alves, katak, ho bareira 4% ne’e bele hamate demokrasia no partisipasaun ativu ParPol nian ba festa demokrasia ne’ebé maka sidadaun Timor-Leste sei festeja iha eleisaun parlamentar ninian.

PEP haree katak, bareira 4% ka tenki hetan votus 28.000 mak bele hetan asentu parlamentar ne’e, la’os sai hanesan barometru ida, maibé lolos ne’e barometru atu manan maka programa, planu ba dezenvolvimentu. Tanba ne’e, PEP nunka hakfodak ba ida ne’e.

“Agora 4% de votus ba kada Partidu Politiku maka foin hetan asentus iha Parlamentu Nasional (PN) ne’e mós forma de asaun ida ne’ebé que agora ita bele hateten hamate mós demokrasia ho partisipasaun ativu. Mas ida ne’e mós diak ba sidadaun hotu ne’ebé hakarak partisipa iha kampo politika hanesan halo ParPol nia tenki esforsu, nune’e atu atinji 4%. ParPol ida tenki lori voz de povo ninian ba garante ninia kompromisu atu dezenvolve rai ida ne’e. Sé lei sai ona hanesan ne’e, qualquer sidadaun ne’ebé harii organizasaun politika atu tuir eleisaun, nia tenki kumpri desizaun ida ne’e,”Sekretáriu Jeral PEP, Antoninho Batista Alves, ba JN-Diário, via telemovel, Kuarta (15/02/2017).

Nia esplika katak, hanesan ParPol, PEP laiha dúvidas atu atinji 4%, tanba PEP hala’o politika la’os buka 4% de’it, maibé halo politika buka atu manan hodi garante programa ne’ebé aprezenta ba povu.

“Depende iha kampaña ita aprezenta programa no planu ne’ebé atu hadi’a kondisaun povu ninian iha nasaun ida ne’e, nune’e depende mós ba povu maka hili, agora sé povu konfia, rona no kompriende saida´maka ParPol PEP aprejenta povu hili nia maka ba ukun no nia maka lori povu ninian aspirasaun atu defende programa ne’ebé iha no lori implementa ba povu nia moris diak,”dehan SekJer PEP.

Nia akresenta katak, tanba ne’e maka PEP laiha dúvidas no laiha hanoin atu buka 4%, maibe ho hanoin, vontade tomak hakaas-an atu halo sosializasaun, konsolidasaun, kampaña no aprezenta programa politiku no dezenvolvimentu, nune’e karik manan sei ukun povu ho modalidade no programa ida, tanba ida ne’e maka sai barometru ba ParPol la’os 4%.

“Bareira ne’ebé que PN aprova atu hetan kadeira iha PN tenki hetan 4% ne’e mós aspeitu ida ne’ebé atu redus aliansa maioria iha PN, agora ParPol kiik no foun ninia estatutu politiku ne’e hanesan de’it, agora depende de’it ba kapasidade lideransa atu aprezenta kondisaun propria hodi garante votantes no simpatizantes ninia konfia atu vota. Ba PEP laiha dúvidas no la tauk ho bareira 4%, tanba ita harii organizasaun ida la’os ho hanoin atu ba hetan 4%, mas harii organizasaun politika ida ho hanoin atu garante povu nia moris,”tenik Antoninho Batista Alves.

Nia salienta katak, ParPol primeiru ne’ebé konsege ultrapasa bareira ba rejistu maka PEP, mais ou menus difikuldades atu priense rekezitus hotu-hotu maka PEP tenta ho reajustamentu dokumentus, hadi’a dala rua (2) no agora hetan ona legalizasaun.

Nune’e, nia dehan, PEP hamriik ho esperansa ida katak ho ninia programa ne’ebé bele manan, tanba laiha estatístika ida maka kalkula tenki hetan kadeira hira, nune’e PEP avansa ona tuir lei foun portantu ultrapasa bareira 4% ne’e PEP laiha difikuldades.

Nune’e mos, Sekretáriu Jeral Partidu Kmanek Haburas Unidade Timor oan (KHUNTO), José Agustinho da Silva, hatete katak, partidu KHUNTO la hakfodak ho alterasaun lei eleisaun Parlamentar nian, ne’ebé Parlamentu Nasionál (PN) hasa’e bareira husi 3% ba 4%.

Ho bareira 4% ne’e, signifika katak, atu hetan asentu parlamentar kadeira ida iha Parlamentu Nasionál, tenki hetan votus 28.000.

Hatan kona ba agora dada’uk Parlamentu Nasionál halo ona alterasaun ba lei eleisaun Parlamentar, li-liu kona ba bareira Parlamentu Nasionál hasa’e husi 3% ba 4%, José Agustinho dehan, partidu KHUNTO submete ba lei.

 “Ami la hakfodak ho bareira 4% ka hira, importante liu ita tenki hakruk ba lei. ha’u labele hola desizaun uluk KHUNTO atu hetan kadeira hira, klaru katak, ami agora servisu maka’as, no ami preparadu duni, intrmus rekursu umanus, KHUNTO realize tiha ona nia primeiru komfrensia nasionál, ho klibru professional KHUNTO ninian iha nivel estudu ka área espesialidade ida-ida,” dehan José Agustinho ba jornalista sira iha sede Kampaña FRETILIN Comoro Dili, Kuarta (15).

Nia hatutan, lei ne’ebé mak orgaun legislativa aprova ona ne’e, nu’udar Timor oan tenki hakruk ba lei ida ne’e.

Nia afirma, estrutura partidu KHUNTO nian iha Postu Administrativu 65, Suku 442,to’o iha Aldeia, partidu KHUNTO nia estrutura metin.

“Atu 3% ka 4% ou 5%, ita tenki submete ba. Partidu KHUNTO hala’o remata ona ninia programa konsolidasaun iha teritoriu tomak. Estrutura nasionál  eleitu liu husi primeiru kongresu nasionál, estrutura 13 Munisipiu, ami estabelese tiha ona liu husi programa konsolidasaun,” katak José agustinho.

Entretantu iha Segunda (13/2), Deputadu Parlamentu Nasional (PN) sira aprova ona lei eleisaun parlamentar ba partidu politiku (Parpol) ne’ebé hetan asentu iha PN ho bareira 4%. Aprovasaun ne’e ho votus a favor 43, kontra 10 no abstensaun 1. Ho aprovasaun bareira 4% mak Parpol sira atu hetan asentu ida iha PN tenki hetan votus 28 mil.ves/cos

Be Sociable, Share!