Ohin, sorteiu ba kandidatu PR nain 8

Ohin, sorteiu ba kandidatu PR nain 8

posted: Thursday, February 16, 2017 | 0 comments | 382 Views

Tribunal Rekursu (TR), ohin Kinta (16/2), sei halo sorteiu ba kandidatu Prezidente Repúblika (PR) nain ualu (8) hodi kompete ba eleisaun prezidensial ne’ebé sei hala’o iha loron 20, fulan Marsu, tinan ne’e.

Kandidatu nain 8 refere mak hanesan, Amorin Viera, Antonio Maher, Antonio da Conceição, Francisco Guterres ‘Lu-Olo’, José Luis Guterres, Luis Alves Tilman, Maria Angela Freitas Silva no ikus liu José Antonio Neves.

“Aban (ohin-red) loron markadu TR atu halo sorteiu ba kandidatu PR sira. Tanba ne’e mak atu bele hatene sekuensias kandidatura sira iha buletin de votus no hafoin de hatene sekuensias buletin de votus, STAE sei koordena ho reprezentante kandidatu  sira nian, nune’e kandidatu sira bele aprezenta hela fotografia nomos emblemas kandidatu sira nian atu nune’e bele koloka iha buletin de votus  atu ikus mai bele hetan apresiasaun husi kandidatu sira ne’e rasik  no aprova husi Comissão Nacional de Eleições (CNE) para ikus mai  ba halo nia prosesu impresaun,”informa Diretor Jeral Sekretáriadu Tékniku Administrasaun Eleitoral (STAE), Acilino Branco.

Acilino dehan, ofisialmente admiti kandidatu PR nain 8 hodi kompete iha eleisaun Prezidensial  periodu 2017-2022.

 “Tersa (14/2) ne’e Tribunal Rekursu (TR) notifika ona mai iha STAE  kona ba kandidatu admitidus ne’ebé mak sei konkore iha eleisoens iha dia 20 Marsu tinan 2017, hanesan ita boot sira hotu mos parese  asesu ona katak iha kandidatu nain 8, iha prosesu verifikasaun  nain  8 ne’e  sei avansa ofisialmente  iha dia 20 de Marsu,” Acilino  Branco ba jornalista sira liu husi konferensia ba imprensa iha  salaun enkontru STAE  Caicoli-Dili, Kuarta(15/2/2017).

Acilino haktuir, tuir lei ne’ebé iha, depois TR fo sai desizaun kandidatu PR definitivu iha Jornal da República mak loron tuir mai TR sei halo sorteiu ba kandidatu sira.

Nia afirma, impresaun  buletin de votus ba eleisaun Prezidensial  refere sei hahú iha loron 24 fulan Fevereiru  to’o loron 13 fulan marsu.

“Nune’e dia 14 hahú intrega ba STAE, dia 15 hahú halo transportasaun ba iha rai liur, dia 16 transporte ba Munisípiu sira, iha loron rua sei iha Munisípiu hodi halo verifikasaun ba vota ne’e, iha dia 19 transporte ba iha sentru votasaun sira no iha dia 20 de Marsu halo eleisoens,”Acilino esplika.

Alende  sorteiu, Acilino mos  informa, iha semana tuir mai sei tama iha periodu kampaña ne’ebé mak sei hahú iha loron 13 to’o loron 15 fulan Marsu. Tanba ne’e iha tempu badak kandidatu sira sei hatama sira nia orariu kampaña iha CNE hodi hetan ajustamentu.ola/car

Be Sociable, Share!