PN kontra PM Rui hakarak muda data base eleisaun ba GPM

PN kontra PM Rui hakarak muda data base eleisaun ba GPM

posted: Wednesday, February 15, 2017 | 0 comments | 105 Views

Parlamentu Nasionál (PN), kontra planu Primeiru Ministru (PM),  Rui Mari de Araújo nian nebe hakarak muda server back up data base eleisaun nian iha Banco Central de Timor-Leste (BCTL) ba fali Gabinete Primeiru Ministru (GPM) iha  Palasiu Governu.

Parlamentu Nasionál kontra ho planu PM Rui nian ne’e, tanba server back up data base ba eleisaun jerais hanesan eleisaun Prezidensial ho eleisaun Parlamentar  muda ba GPM, seguransa laiha ona.

“Ha’u nia preokupasaun ne’e  tanba, server back up data base eleisaun nian, ne’ebé mak durante ne’e tau iha Banco Central hanesan fatin ida ne’ebé imparsial, no fatin ida ne’ebé seguru tebes. Durante ne’e ita nia data base back up eleisoens tau iha ne’eba,  agora dada’uk tuir informasaun katak, Primeiru Ministru hakarak muda buat ne’e ba tau fali iha Palasiu Governu, edifisiu públiku,”informa Xefi bankada CNRT, Natalino dos Santos iha plenária, Tersa (14/02).

Nia hatutan, durante ne’e, server back up data base eleisaun tau iha Banco Central, fatin ne’e seguru no imparsial tebes, maibé tanba saida mak Primeiru Ministru derpenti de’it hakarak muda server ne’e ba Gabinete PM.

 “Tanba saida mak server back up data base eleisoens nian, agora dada’uk hakarak atu muda fali ba edifisiu públiku iha palasiu Governu,”kestiona Natalino dos Santos.

Alende ne’e, deputadu Antoninho Bianco husi bankada FRETILIN mós dehan, nia hanoin server back up data base eleisaun nian ne’e, kestaun nasaun nian.

“Governu hanoin kala seguransa mós iha ona karik, tanba uluk Governu mak opta tau iha Banco Central,  agora se Governu senti katak, sira bele asegura ona, bele tau iha fatin ne’ebé mak sira hakarak. Governu mak halo jestaun atu muda, ita tenki husu ba Governu, tanba Governu ne’e jestor Estadu,” katak Antoninho.

Maibé Antoninho dehan, tuir nia haree, data base eleisaun ne’e, ladun importante, tanba la’os seguransa nasaun nian.

To’o notisia ne’e hatun, jornalista JN-Diário, seida’uk hetan konfirmasaun husi PM Rui Maria de Araújo.cos

Be Sociable, Share!
(Visited 2 times, 2 visits today)