Taur preokupa Oecusse-oan tauk fó informasaun

Taur preokupa Oecusse-oan tauk fó informasaun

posted: Tuesday, February 14, 2017 | 0 comments | 265 Views

Prezidenti Republika (PR), Taur Matan Ruak, preokupa ho situasaun moris komunidade Oecusse nian, ne’ebé tauk atu fo informasaun ba jornalista relasiona ho realidade Oecusse nian.

“Jornalista sira atu entrevista ho komunidade Oecusse, mas ha’u rona imi tauk atu koalia. Tanbasa, imi tauk, imi tauk Alkatiri, Xanana, ou imi nia Diretur sira iha ne’e,” hateten PR Taur iha intervensaun ba dialogu komunitaria ho komunidade   Suku Ussitasae, Região Administrativu Oessilo, Região Espesial Oecusse, Segunda (13/02/2017).

PR Taur husu ba povu Oecusse atu unidade no koalia ba oin. La bele koalia iha kotuk-kotuk tanba tauk fali autoridade sira, atu hanesan fali tempu Português nian, ne’ebé povu sira tauk los ho moradores.

“Hau iha uma nudar aman ida no komunidade ida, maske hau Prezidenti Republika. Hau nia kaben mos iha uma nudar inan ida ba oan sira. Iha kantor mak bolu Primeira Dama, tanba ne’e, ita kuandu ba ukun la bele foti-an (sombong),”  hateten PR Taur.

Nia husu ba komunidade Oecusse atu kolabora no servisu hamutuk ho autoridade sira. Atu nune’e, mosu naksalak ruma buka para tuur hamutuk rezolve hodi hetan solusaun ne’ebé satifas ba interese nasional.

 “Hau fiar katak ita presiza Nasaun ne’e moris diak, maibé Nasaun ne’e foin ukun-an tinan 15 ne’e hanesan ita oan feto ida ne’ebé foin moris seidauk bele moris mesak no hanesan ai-funan ida ita foin kuda, presiza kuidadu, atu labarik sira labele silu tiha no rega bebeik para ai-funan ne’e buras,” afirma PR Taur Matan Ruak. eus 

Be Sociable, Share!