FC Portu Taibesi diskuti destiñu klubu

FC Portu Taibesi diskuti destiñu klubu

posted: Monday, February 13, 2017 | 0 comments | 419 Views

Estrutura FC Portu Taibesi, Sábadu (11/02), konsentra hamutuk iha Rozela Restaurante Metiaut-Díli, hodi diskuti konaba destiñu FC Portu Taibesi nian ba futuru.

Prezidenti interinu FC Portu Taibesi, Agostino Nunes informa katak, liu husi sorumutu ne’e, estrutura FC Portu Taibesi, bele halo avaliasaun no mós buka oinsa atu bele responde ba situasaun no nesesidades oras ne’e dadaun klubu Portu hasoru.

“Ema hotu hatene uluk Portu Taibesi ho sponsor husi maun-alin balun, maibé agora sira fila fali ba sira nia fatin la’os ona sponsor, tanba ne’e maka agora Portu Taibesi laiha sponsor, maibé ami la’o nafatin liu husi apoiu malu. Ami sei hamriik ho subsídiu ne’ebé ami hetan maske ida ne’e hanesan todan ida, maibé ami tenki avansa nafatin tanba dignidade Portu nian labele halo lakon,” dehan Agostino Nunes iha Rozela Restaurante Metiaut, Sábadu (11/02/2017).

Prezidenti ne’e mos rekoñese katak kuaze jogador FC Portu Taibesi sai hotu kedas, tanba ne’e klubu mós preokupa oituan.

“Ami nia jogador kuaze sai hotu kedas, jogador sira sai ami sente ulun fatuk moras, ami mós laiha kontratu ida ho sira entaun sira sai mós ami labele kesi sira. Ida ne’ebé todan mós mai ami maka sei joga iha Baucau no Maliana tanba laiha sponsor maka atu ajuda ami tanba ne’e ami bolu malu mai iha ne’e, ami mesak Taibesi oan deit atu buka solusaun ba kestaun ne’e hodi haree konaba destiñu klubu nian no atu responde ba epoka agora,” nia deklara.

Nia dehan tan, iha sorumutu ne’e konsege hetan solusaun ruma maka hanesan sósiu hamutuk hodi haree ba nesesidade ne’ebé klubu presiza ba segundu epoka. Klubu mós prepara ona jogador hamutuk 27 pesoas husi Taibesi oan duni atu kompete iha segunda epoka ne’e.

“Ami mós iha hanoin atu lori jogador husi etranjeirus ida ou rua atu bele priense númeru jogadores nian, ami hanoin atu foti husi Indonesia no Australia hodi priense ba avansadu nian,” dehan nia.

Nia mós esplika tan katak, mosu mós pro kontra atu troka naran Portu Taibesi maibé Prezidenti ne’e informa katak Portu Taibesi sei la troka naran.

“La troka naran la signifika katak Portu Taibesi ne’e ami nian, ida ne’e la’e, Portu Taibesi ne’e ema hotu nian, nakloke ba ema hotu tantu ba adeptus no sponsor sira,” nia esplika.nes

Be Sociable, Share!