Kongresu FFTL, Klubu 5 deit mak iha direitu ba vota

Kongresu FFTL, Klubu 5 deit mak iha direitu ba vota

posted: Thursday, February 09, 2017 | 0 comments | 103 Views

Membrus estrutura ezekutivu FFTL hamutuk ho asosiasaun futebol sira, Kuarta feira (8/2) ne’e, hala’o enkontru alargada hodi diskuti konaba problema ne’ebé mak oras ne’e dadaun FFTL infrenta inklui mós desidi klubu sira ne’ebé mak iha direitu ba fó sira nia votus iha Kongresu FFTL nian ne’ebé sei realiza iha fulan Abril 2017.

Hafoin enkontru, Porta voz Federasaun Futebol Timor Leste (FFTL), Octávio da Conçeicão informa katak, klubu sira ne’ebé rejistu iha FFTL ne’e hamutuk klubu lima (5) deit no sira maka iha direitu atu vota iha kongresu.

“Tuir estatutu Federasaun nian klubu ne’ebé agora ezisti laiha direitu atu tuir vota iha kongresu só sira ne’ebé hetan ona lisensa ou rejistu ona iha federasaun maka iha direitu ba votus no mós asosiasaun sira,” dehan Octávio da Conçeicão depois de enkontru entre FFTL no Asosiasaun husi 13 Munisípius iha edifísiu FFTL, Bairo dos Grilhos Kuarta (08/02/2017).

Maski nune’e, maibé Octávio la fó sai konaba naran klubu 5 ne’ebé rejistu ona iha FFTL ne’e, maibé Octávio dehan, naran sei fó sai wainhira iha kongresu laran.

Kona ba klubu 21 ne’ebé oras ne’e kompete iha Liga Futebol Amadora (LFA), nia dehan FFTL sei haree rekezitus oinsa maka klubu sira ne’e bele partisipa iha kongresu.

Winhira husu konaba karik husi FFTL sei fó oportunidade ba klubu sira seluk atu rejistu atu sai membru FFTL hodi partisipa iha kongresu, Octávio dehan ne’e depende ba klubu sira nia rekezitus.

“Konaba rekezitus ami labele fo sai agora ho razaun tanba ida ne’e internal federasaun nian tanba ne’e maka labele fó sai,” dehan nia.

Porta voz FFTL ne’e mós informa katak liu husi enkontru ne’e desidi ona katak liu husi Prezidenti Federasaun hamutuk ho ezekutivu sira no Prezidenti Asosiasaun Futebol, Prezidenti Arbitrajen, Treinador no Prezidenti Asosiasaun futebol Feto nian halo enkontru jeral hodi buka hatene no rezolve situasaun ne’ebé FFTL hasoru.

“Iha enkontru ne’e ezukutivu hamutuk ho asosiasaun sira deisidi katak funsionamentu normalmente ba federasaun nian nomeia ona Vise Prezidenti Osório Florindo maka asumi responsabilidade nu’udar ezekutivu to’o kongresu iha fulan Abril. Hatudu mós ema nain rua hanesan porta voz provizóriu maka Nelio Isac no ha’u rasik atu prepara kondisaun ba to’o kongresu iha fulan Abril oin mai,” dehan Octavio da Conceição.

Nia esplika tan katak, razaun hili Osorio Florindo tanba Sekretariu Jeral atual tuir desizaun AFC nian katak nia hetan sansaun durante tinan 3 labele halo servisu hanesan administrasaun iha bola tanba ne’e maka hatudu Osorio Florindo hanesan responsavel to’o kongresu.

Nia dehan tan konaba desisaun sira seluk parte federasaun seidauk bele fó sai agora maibé aban dadersan depois de entrega rekomendasaun sira ne’e ba iha Sekretariu Estadu Juventudi no Desportu (SEJD) Leovigildo Hornai maka sei fó sai rezultdu sira seluk.

Iha fatin hanesan Prezidenti Asosiasaun husi Munisipiu Ermera Lomelino Salsinha informa katak objetivu enkontru ne’e atu haree konaba sansaun ne’ebé FFTL hasoru.

“Tuir informsaun ne’ebé ita hetan katak durante ne’e desportu ladun la’o entaun oinsa maka ami husi Asosiaun mai hamutuk ho ezekutivu FFTL atu haree kestaun ne’e ba oin, relasiona mós ho atividade ne’ebé iha dia 10 iha enkontru ho Governu maibé ita haree katak Asosiasaun ne’e iha mahon husi FFTL ne’ebé Asosiasaun mós labele ses husi régras no regulamentu ne’ebé iha entaun ohin ami reuni mós oinsa maka atu responde ba situasaun ne’ebé iha,” dehan Lomelino Salsinha iha FFTL.

Nia dehan tan iha enkontru ne’e mós atu haree konaba sansaun ne’ebé AFC fó ba FFTL ne’ebé ohin ezekutivu sira esklarese ona katak sansaun ne’ebé hetan só ba tinan 2023.

“Ami mós husu oinsa maka Asosiasaun ho FFTL bele servisu hamutuk hodi hadia faillansu ne’ebé iha. Husi Ermera iha klubu 4 maka rejistu iha Asosiasaun hanesan Café Junior, Ermera City, Bulgaria no Ira Café no agora so klubu Café deit maka tama iha LFA no tolu seluk ne’e sei iha Ermera. Ami labele halo buat ida tanba estadiun mós sobu hela,” dehan nia.

Nia dehan tan, ho situasaun ne’ebé Ermera infrenta dadaun ne’e, husi parte Asosiasaun mós akompaiña deit jogu komunitáriu ne’ebé Governu realiza.

“Ami husi Asosiasaun ne’e hein deit kuandu iha aktividade ruma ami prepara jogador tantu husi Governu presiza ou LFA presiza ami suporta no rekomenda deit,” nia esplika.nes

Be Sociable, Share!
(Visited 1 times, 1 visits today)