Igreja TL, Presiza hadia paradígma pastoral

Igreja TL, Presiza hadia paradígma pastoral

posted: Thursday, February 09, 2017 | 0 comments | 121 Views

Pe. Gabriel Suban Koten, SVD dehan, igreja lokál Timor-Leste (TL) presiza hadia paradígma pastorál, katak amu lulik sira labele hein de’it iha fatin no sarani sira mak ba buka, maibé tenki la’o ba hasoru sarani sira iha sira nia realidade moris.

“Ho prezensa seitas relijiozas barak iha ita nia rain, sai mós hanesan pontu de aprendizajen ka lisaun ba igreja Katolika Timor Leste, katak Igreja lokál iha Timor Leste, amu bispu, amu-lulik, madres, katekistas no sarani sira hotu, ita presiza hadia ita nia paradigma pastoral, katak amu lulik labele hela iha nia rezidénsia i hein sarani sira mai, ida ne’e tempu rezisténsia nian ema barak buka amu lulik, maibé agora amu lulik mak tenki buka ema, la’o to’o iha ema nia fatin, hasoru sarani sira iha sira nia realidade moris,”esplika Pe. Gabriel Suban Koten, iha nia serbisu fatin, Kapela SOVERDE Kuluhun, Kuarta (8/2).

Pe. Gabriel hatutan katak, la’o tama sai uma hodi haklaken konaba fiar no haree realidade moris ema nian mak forma ne’ebé seitas relijiosas nia pastores sira uza, sira la’o husi fatin-fatin, tama to’o uma sarani nian no hela ho ema iha ne’eba no ema dehan, Maromak ba ona iha sira nia uma.

“Ida ne’e lisaun ida mai ita, katak ita la’os de’it hela iha ita nia fatin, maibé ita tenki la’o ba hasoru ita nia sarani sira, tamba ne’e mak mudansa paradígma pastoral ne’e importante,”haktuir Pe. Gabriel iha nia esplikasaun.

Nune’e Pe. SVD ne’e fundamenta katak, mudansa paradígma ne’e tenki la’o tuir mós pasu konkretu sarani nian atu nune’e sira bele metin nafatin iha dalan no hanorin kreda Katolika nian.

“Maski ida ne’e hanesan dezafiu boot ida mai ita, maibé ao mesmu tempu sai mós hanesan oportunidade ba igreja atu bele trata fali nia-an no nia kna’ar pastoral hodi bele atende di’ak liutan sarani sira iha ita nia rain Timor Leste,” Pe. Gabriel afirma.ías

Be Sociable, Share!
(Visited 1 times, 1 visits today)