Jerasaun foun tenki luta ba povu nia moris diak

Jerasaun foun tenki luta ba povu nia moris diak

posted: Tuesday, January 03, 2017 | 0 comments | 176 Views

Prezidenti Parlamentu Nasional, Aderito Hugo da Costa, dehan, saudozu Nicolau dos Reis Lobato ninia luta hatudu dalan ba povu, tane aas interese nasional liu fali interese sira seluk.

Nia hatudu mos mai ita konaba konsistensia atu defende soberania, tanba ne’e ita tenki banati tuir saida mak saudoso Nicolau hatudu ona mai ita hodi dezenvolve ita nia rain atu sai diak iha futuru hodi fo benefisiu ba povu.

“Iha faze ida agora ita tenki tane aas interese nasional hanesan saudoso hatudu, hala’o ita ida-idak ninia papel didiak atu dezenvolve rai ne’e ho responsabilidade hodi lori povu hetan moris diak iha ukun an,” dehan Aderito Hugo

Deputadu husi partidu CNRT ne’e hatutan, heroi sira fo an mate atu defende hodi hetan ita nia soberanu, ita nia obrigasaun nudar jerasaun foun  hatutan sira nia mehi hodi tane aas sira nia obra ne’ebé rai hela mai ita ho dignu.

Nia afirma, selebrasaun ne’e importante, liu-liu ba jerasaun agora ne’ebé lahare no la akompanha luta saudoso nian liu husi ninia pensamentu no mehi ba futuru TL.

Ba saudozu komprimisu ne’ebé karun tebes mak última bala é a minha vitoria, ne’ebé hatudu luta ba idiolismu tenki to’o susesu mesmu ninia konsekuensia ne’e bo’ot.

Nia atitude no liafuan sira ne’e hatudu mai ita katak, saudoso Nicolau Lobato heroi TL nian ida ne’ebé laos deit prezidenti republika no Primeiru Ministru, maibé nia mos komandante em xefi Falintil nian hodi lidera funu mesmu nia lakon nia familia no ikus mai nia ofrese nia an hodi salva nia kompanheru sira hodi hatutan funu.

Hanesan maun bo’ot Xanana Gusmão hato’o iha Aiserimou tinan 2015 liu ba katak, ba heroi sira nia mehi laos deit ita atu hetan bandeira no laos deit atu hetan orgaun soberanu, maibé sira nia mehi dehan ba ita atu kaer metin soberanu estadu, tanba ne’e Timoroan hotu tenki hamutuk hanoin ida deit tane aas interese nasaun no povu, ho nune’e ita fo ondra no valor ba sakrifisiu saudoso Nicolau nian ho nia asuwain sira seluk.nty

Be Sociable, Share!