Governu promete ezekuta OJE 2017 ho kualidade

Governu promete ezekuta OJE 2017 ho kualidade

posted: Friday, December 30, 2016 | 0 comments | 293 Views

Primeiru Ministru (PM), Rui Maria de Araújo, agradese  Prezidente Repúblika (PR), Taur Matan Ruak, ne’ebé promulga  ona Orsamentu Jeral Estadu (OJE) tinan 2017 ho montante US$1.4 Bilioens, no promete sei ezekuta OJE ne’e ho kualidade.

 PM Rui dehan,  ho orsamentu  ne’ebé mak  promulga ona husi PR Taur iha Kuarta (28/12), Governu sei haree didiak ba setor sira ne’ebé nesesariu tuir politika ne’ebé iha ona.

“Agradese Prezidente Repúblika ne’ebé promulga  ona OJE tinan 2017,”esplika PM Rui Maria de Araújo, ba  jornalista sira, hafoin enkontru ikus tinan 2017 ninian  ho Xefi Estadu Taur Matan Ruak, iha Palasiu Prezidensial Aitarak Laran, Kinta (29/12).

Antes  ne’e OJE   ne’ebé mak Parlamentu Nasional (PN), aprova  ne’e  iha meadu fulan Dezembru   tinan 2016 ninian hodi haruka ba Prezidente Repúblika  promulga.

PM Rui realsa katak,  OJE  2017  sei   prioridade  ba infraestrutura, edukasaun, saude, agrikultura.

“Klaru ita sei  presiza dezenvolve diak liu tan ita nia kapasidade atu ezekuta OJE  ne’e  la’os deit em termos de montante orsamentu ne’ebé ita gasta, maibe kualidade husi rezultadu  ne’e mak importante tebes,  depois buka koa  despezas sira  ne’ebé la presiza despezas super plus ,”hateten PM Rui.

Xefi Governu ne’e hatutan, wainhira  Governu hahú,  Governu koalia.

“Klaru que 2015 mai to’o agora  ita konsege halo duni buat balun,  ita konsege koa duni despezas super plus,  maibe  iha buat lubuk ne’ebé mak  ita presiza atu hadia tantu ba 2017 Governu konsentra nafatin ba implementa  Orsamentu  ne’e ho kualidade buka hases despezas sira ne’ebé super plus, ”hateten PM Rui.

Alen de ne’e mós PM Rui esplika,  durante  enkontru  ho Prezidente  Republika  koalia kona-ba situasaun seguransa nasaun  Timor-Leste nian durante  selebrasaun loron natal.

PM Rui dehan, durante selebra loron natal ne’e  iha problema kiikoan  ne’ebé mak  mosu iha Dili no Baucau.   Nomos iha  enkontru koalia kona-ba seguransa ho defeza  servisu hamutuk  hodi garante seguransa selebrasaun tinan foun ninian.

“Tanba   ita hatene katak,  iha tinan 2017  festa demokrasia  eleisoens,  portantu  kestaun seguransa  Timor-Leste ninian  importante teb-tebes,”hateten PM Rui.avi

Be Sociable, Share!