Timor Leste fó parabens ba Donald Trump

Timor Leste fó parabens ba Donald Trump

posted: Friday, November 11, 2016 | 0 comments | 458 Views

Prezidente Republika (PR), Taur Matan Ruak lori povu Timor Leste ninia naran hatoo parabens ba prezidente eleitu Estadus Unidos Amerika (EUA), Donald Trump hodi halakon ninia adversariu Hillary Clinton.

“Hanesan Prezidente Republika hodi povu Timor Leste nia naran, hakarak  kongratula Donald Trump ne’ebe mak eleito ona hanesan prezidenre Estados Unidus Amerika nian. Hakarak mos hato’o votus parabens ba povu Estados Unidus ba implementasaun eleisaun prezidensial ne’ebe la’o ho diak, no rezultado eleisaun prezidensial ne’ebe refleta vota maioria povu Estado ne’e ninian,” hateten PR Taur Matan Ruak liu husi karta komunikadu ne’ebe mak sala redasaun JNDiario simu iha Taibesi, Dili, Kinta (10/11/2016).          Xefi Estado ne’e iha esperasaun boot ba prezidente eleito ne’e katak, ho mandatu foun ne’e bele hametin diak liu tan relasaun ne’ebe mak iha.

“Hau iha esperasan boot katak, ho ita boot (Donald-red) nia mandatu foun ne’e, sei nafatin hametin liu tan relasaun atraves kooperasaun entre Estado ho Estado ne’ebe maka hala’o ona durante ne’e, no sei kontinua hametin liu tan mos ita nia serbisu hamutuk atu hari’i dame no kria properidade ba mundu tomak,” esperansa PR Taur.

Iha biban ne’e, PR Taur dezeja saude diak no susesu nafatin ba prezidente Eleito Donald Trump.

Husi sorin seluk, reprezentante povu TL nian  mos hato’o kongratuasaun ba Donal Trump.

Ba jornalista sira Prezidenti PN, Aderito Hugo da Costa, hateten, ida ne’e prosesu elisaun nebe demokratiku hein katak prezidenti foun ne’e ho nia komprimisiu ne’ebe halo iha kampaña eleitoral bele ejekuta.

“Hanesan Timor oan ida hau hanoin kompromisiu nebe nia halo iha nia kampaña eleitoral refleta situasaun atual ba nasaun hotu – hotu, hau apresia teb–tebes ba nia kompromisiu nebe dehan katak Amerikan Fers, ida ne’e mensajen ba ita Timor tenki hare katak tau intrese nasional uluk duke intrese ema seluk nian, ida ne’e mak sai influensa bo’ot ida hodi nia bele konvense Amerikanu maioria hodi fo vitoria ba nia,” dehan Prezidenti PN iha Novo Turismo.

“Hau la importa ho nia deklarasaun nebe kontroversial maibe hau fiar nia hetan mandatu nebe povu Amerikanu fo ba nia, nia sei ejekuta ida ne’e ho responsabilidade tomak, hau mos fiar katak ho relasaun nebe durante ne’e Timor Leste halo ho posisaun laiha inimigu so iha deit amigu iha posisaun politika estranjeurus iha Timor Leste nian, ita hein katak Presidente eleitu Donal Trump bele kontinua reforsa relasaun bilateral entre Timor Leste ho Estadus Unidus da Amerika hodi dezemvolve nasaun rua ne’e diak liutan ba oin,” hateten Aderito Hugo

Kona ba politika Donald Trump ne’ebe sei minimiza dividas internasional, karik fo impaktu ba osan Dolar nebe Timor Leste uja hela, Aderito hatete despeza bo’ot ba apoiu internasional nian ida ne’e maka sai prekupasaun bo’ot ba iha kompromisio eleitoral Donal Trump nian, redus apoiu internasional sira tanba imprinsipiu Amerika persija nafatin relasaun bilateral.

Nunee mos Primeiru Ministru Interinu, Dionisio Babo lori governu ninia naran hatoo parabens ba Presidente eleitu Donald Trump .

“Lori Governu Timor-Leste nia naran hakarak hato’o parabens   felisitasaun ba povu Amerikano ba ezersisiu demokratiku ne’ebé  mak  konsege hili  sira ninia  Prezidente Repúblika Donald Trump hanesan Prezidente ba periode tinan hat mai. Ita espera katak, relasaun  entre país rua la’o diak nafatin,”dehan  Dionisio Babo.

Iha parte seluk Deputadu Osorio Florindo hateten, Donal Trump hanesan Presidente kontroversial maibe nia positivu iha, tanba saida maka Donal Trump hetan votus barak, tanba Donald Trump kuda sentimentu nasionalismu ba ema rai nain mesmu Donald Trump anti ema Irak sira, Islamiku sira maibe Donald Trump fo garente ba ema rai nain sira tanba ne’e Donal Trump nia votus barak. “Hau hanoin nasaun nebe Donald Trump tenki halo link maka Israel, ne’e nia deklarasaun sai kedas katak nia sei servisu hamutuk ho Israel, ema hatene Israel ne’e sentru nuklir, matenek nain iha Amerika mesak Israel entaun nia tenki kaer ida ne’e uluk, depois deklarasaun tuir mai maka nia sei servisu hamutuk ho Rusia i Rusia fo resposta nebe positivu,” dehan Osorio Florindo.

Donald Trump hanesan Presidente kontroversial oinsa karik Donald Trump dada fali Dolar husi Timor Leste, Osorio dehan Amerika bele dada osan dolar husi Timor sei wainhira Timor halo krimi kontra Amerika nia dolar, ida ne’e posibel Amerika bele dada.

“Hau la fiar nia atu dada dolar tanba ekonomia global iha mundo ne’e kuandu dolar ejiste iha nasaun barak ida ne’e maka sira hakarak, siknifika bele aumenta ba sira nia ekonomia,” hateten Osorio Florindo.

Karik Amerika dada dolar Deputadu ne’e hatete Estadu tenki buka dalan lalais tanba atu loke banku ida mos tenki garantia ne’e maka’as, tenki garantia rasik.

Deputadu Virgilho Hornay kongratula ba kandidatu rua Donald Trump no Hillary Clinton no ikus mai Donald Trump maka eleitu sai Prezidenti.

“Ita nafatin iha relasaun bilateral liu liu iha asuntu defesa seguransa tanba durante ne’e sira nia apoiu ba militar, ne’e sira intensivu tebes, fo formasaun ba ita nia superior, hau hanoin Amerika importante ba pais hotu hotu tanba nia hanesan pais ida nebe fo balansu iha nivel rejional no mos internasional,” dehan Virgilho.

Nia dehan tan kona ba moeda (mata uang) Timor seidauk iha kapasidade atu iha moeda rasik tanba kapasidade iha area ekonomia seidauk forte, persija hare katak nesesidade nebe Timor iha kuase importasaun, tanba ne’e maka Timor seidauk bele iha moeda rasik.

Presidente eleitu Amerika, Donald Jhon Trump husi Partidu Republikanu hodi halakon nia adversariu Hillary Clinton husi Partidu Demokrata. mia/mes/avi

Be Sociable, Share!