TL entrega Prezidensia CPLP ba Brazil iha 31 Outubru

TL entrega Prezidensia CPLP ba Brazil iha 31 Outubru

posted: Tuesday, October 25, 2016 | 0 comments | 455 Views

Ministru Negosius Estranjeirus i Kooperasaun (MNEK), Hernani Coelho informa katak, Timor Leste (TL) sei entrega Prezidénsia rotativa Comunidade dos Países da Língua Portuguesa (CPLP), ba Brazil iha loron 31 Outubru 2016.

Tanba ne’e, Hernani Coelho informa katak, iha sorumutu ho Prezidenti Repúblika (PR) Taur Matan Ruak ne’e, nia aktualiza ba Xefi Estadu ne’e kona-ba preparasaun atu entrega Prezidénsia CPLP ba Brazil.

“Programa entrega Prezidénsia rotativa CPLP sei akontese iha loron 31 to’o loron 1 Novembru. Simeiras Xefi Estadu no Xefi Governu sei akontese iha loron 31 lokraik ho loron 1 Novembru, maibé atividades Konsellu Ministrus nian sei hala’o iha loron 31 Outubru dader,” informa Hernani Coelho ba jornalista sira iha Palácio Prezidensia Aitarak Laran Díli, Segunda (24/10).

Maibé Hernani dehan, preparasaun ne’e, agora dada’uk komesa la’o tiha ona, i iha loron 26 Outubru ne’e, komesa hahú reuniaun regulares husi pontu fokál sira.

Nia afirma, tema global ba simeira CPLP iha Brazil ne’e mak, dezenvolvimentu sustentavel ninian.

Hernani hatutan, iha simeira ne’e mós, sei debate rezolusaun balu, maibé Hernani dehan nia labele deklara sai lai rezolusaun sira ne’e.

Tanba tuir Hernani katak, rezolusaun hirak ne’e konsentra CPLP nia vida ekonómia, kultural, nomós situasaun atual balu ne’ebé relasiona ho mundu nian.

Hernani afirma, delegasaun Timor Leste (TL) nian ne’ebé mak atu aranka ba Portugal sei lato’o ema nain tolu nulu (30). Purtantu delegasaun Prezidenti Repúblika nian sei aranka iha loron 27 fulan ida ne’e.

Iha sorumutu ne’e mós, sira ko’alia kona-ba preparasaun kona-ba atividades kondekorasaun ne’ebé mak Prezidenti Repúblika sei entrega ba ema balu iha Portugal.

“Prezidenti Repúblika sei para iha Portugal loron sorin, para bele halo mós atividade balu iha Portugal, relasiona ho kondekorasaun entidades balu ne’eb’e mak ita halo iha Portugal,” katak Hernani.

Nia haktuir, entidades sira ne’ebé mak atu simu kondekorasaun iha Portugal ne’e mak hanesan, eis Prezidenti Repúblika Portugal nain rua malae ida, no restu ne’e Timor-oan sira ne’ebé mak kontribui ba Timor Leste  nia luta libertasaun.

“Ami sempre buka para halo aktualizasau regular ba Prezidenti Repúblika, kona-ba atividades ne’ebé mak Governu halo, li-liu atividades ne’ebé relasiona ho ita nia polítika externa,” relata Hernani.

Nia esklarese, iha sorumutu  ne’e, nia informa ba PR Taur Matan Ruak kona-ba atividades externa husi fulan Juñu to’o fulan Setembru ninian, li-liu ho Partisipasaun Timor Leste iha nasoens unidas nian.

Alende ne’e, Hernani dehan, nia informa mós ba PR Taur kona-ba atividades ne’ebé mak Timor Leste halo iha Estadus Unidus iha fulan Setembru.

“Ita vizita ita nia belun sira ne’ebé mak uluk  apoiu ita, nomós kontinua ba Washington hodi ko’alia mós kona-ba kestoens ne’ebé mak ita halo hela oras ne’e hanesan fronteiras marítimas, nomós sira seluk,” tenik Hernani.cos

Be Sociable, Share!