Estadu TL hato’o sentidu kondolensia ba liurai Thailandia

Estadu TL hato’o sentidu kondolensia ba liurai Thailandia

posted: Monday, October 17, 2016 | 0 comments | 791 Views

Prezidente Repúblika, Taur Matan Ruak, lori povu Timor tomak nia naran hato’o sentidu kondolénsias ba Liurai Reinu Tailándia, Sua Majestade Bhumibol Adulyadej, ne’ebé mate iha Bangkok, Tailándia, iha Kinta (13/10/2016).

Bazeia ba informasaun ne’ebe hetan husi fontes balun katak, matebian Liurai Bhumibol Adulyadej iha kondisaun saúde ne’ebe maka ladun diak iha tinan hirak ikus ne’e nia laran, no ladun marka prezensa iha públiku.

Haktuir fali ba ansiedade husi públiku, palásiu ikus mai anúnsiu, no informa sobre liurai nia mate iha kinta-feira kalan iha Ospitál Siriraj, iha Bangkok, Tailándia.

Haktuir fali ba notísia ne’e, Prezidente Repúblika, Taur Matan Ruak, hodi Estadu no Povu Timor-Leste nia naran, hato’o sentidu kondolénsias ho liafuan hirak tuirmai:

“Ha’u sente triste wainhira rona notísia kona-ba Sua Majestade nia mate. Sua Majestade hanesan lider estadista ne’ebé povu tailandés sira respeita no admira tebes. Iha nia lideransa, Sua Majestade sempre hakbesik an ba nia povu, kaer valores dame, unidade no bem-estar ba interese povu Tailándia nian,” hateten Prezidente Taur Matan Ruak liu husi karta komunikadu ne’ebe mak redasaun JNDiario simu iha Taibesi, Sabado (15/10/2016).

Xefi Estado hakarak aproveita momentu susar ida-ne’e, hakarak atu hodi Estadu no Povu Timor-Leste nia naran, no mós ha’u-nia naran rasik hato’o profunda sentidu kondolénsias ba Sua Majestadu nia mate. Sua Majestade nia mate, la’ós de’it ba povu Tailándia maka sente lakon, maibé mundu mós lakon lideransa di’ak ida. */mia

Be Sociable, Share!