PM Rui husu EUA, Desblokeia komersiu finanseiru ekonomia Cuba

PM Rui husu EUA, Desblokeia komersiu finanseiru ekonomia Cuba

posted: Wednesday, September 28, 2016 | 0 comments | 955 Views

Primeiru Ministru (PM), Rui Maria de Araújo, liu husi asembleia jeral Nasoens Unidas,  husu ba Estadu Unidus Amerika (EUA)  presiza lalais  desblokeia   komersiu,  finanseiru  no ekonómiku ba Repúplika Cuba.

“Ami apela atu Estadus Unidus Amérika presija lalais desblokeia komersiu, finanseiru no ekonómiku ba Repúblika Cuba,”esplika PM Rui, liu husi komunikadu  imprensa ne’ebé mak JN-Diário, simu husi Gabineti PM, Tersa (27/09).

Liu husi Asembleia Jeral  Nasoens   Unidas  ne’e, PM Rui  mos hato’o rahun-kmanek ba Prezidente Assembleia Jerál Nasoens Unidas nian, Peter Thomson, no hein katak nia bele hetan susesu boot iha hala’o ninia funsaun foun sira. Ksolok boot tebes ba Timor-Leste, illa sorin-balun ida, bainhira haré katak,  reprezentante ida hosi illa Pasífiku maka prezide órgaun nobre ida ne’e.

“Ha’u fiar katak nia hatene didi’ak dezafiu hirak ne’ebé ita hasoru bainhira ita koalia kona-ba  alterasaun klimátika no jestaun ba ita nia tasi no ninia rekursus sira,”hatete PM Rui.

Nune’e mos PM Rui  hato’o rahun-kmanek ba Prezidente sesante, Mogens Lykketoft, ba servisu hotu ne’ebé nia hala’o ona no ba esforsu boot iha revitaliza Asembleia Jerál, hodi halo nia sai efikáz no efisiente liu tan, hodi reforsa ninia papél iha hala’o ninia kompeténsia hirak ne’ebé define ona iha Karta Nasoens Unidas nian no, foti mos ninia kompromisu ba transparénsia iha prosesu selesaun Sekretáriu-Jerál nian tuir mai.

“No tanba ida ne’e hanesan ninia Asembleia Jerál ba dala ikus ha’u mos hakarak hodi Timor-Leste no ninia povu nia naran atu hato’o ba Sekretáriu-Jerál Ban Ki-moon ami nia apresu ida kle’an tanba apoiu hirak hotu ne’ebé Timor-Leste simu ona iha durante nia mandatu tinan 10 laran,”hatete PM Rui.

Ninia legadu hatur tiha ona baze sira ba reforma burokrasia nian ida, reforma ba operasun pás nian ida, impulsiona tiha ona inisiativa hirak ne’ebé tau ba oin direitus humanus,alterasaun klimátika sira, refujiadu no migrantesira. Hanesan simblou ideal Nasoens Unidas nian sira,  Ban Ki-moon, servisu ba mundu ida seguru liu, ba feto sira no ba klosan sira, ba dezenvolvimentu sustentável no ba importánsia hosi papél prevensaun nian.

Ida ne’e hatudu biban di’ak ida atu, liu hosi esperiénsia ne’ebé halibur no rekomendasaun hirak hato’o iha relatóriu sira ne’ebé apresenta kona-ba Operasaun Pás nian, Arkitektura ba harí Pás ninian no Rezolusaun 1325 Konsellu Seguransa nian kona-ba Feto, Pás no Seguransa, bele hala’o ona mudansa sira.

Promosaun koerénsia intergovernamentál, há forte Komisaun Konsolidasaun Pás nian no parseria siraba ninia manutensaun maka sai nu’udar rekomendasan balun nebe atu bele hadi’a sistema Nasoens Unidas nian.

“Presija katak ita nia esforsu konjuntu bele hatán ona ho efikás liu tan ba dezafiu hirak ne’ebé ita nia povu hasoru. Ita kontinua hasoru bebeik situasaun dezigualdade no konflitu nian, ne’ebé ameasa ita nia estabilidade no seguransa koletiva. Ita hotu hatene no Timor-Leste liu hosi ninia esperiénsia rasik, katak Nasoens Unidas maka fundamental iha atu garante seguransa ba povu no ba país iha mundu rai klaran,”hatete PM Rui.

Iha pensamentu ida ne’e duni maka Timor-Leste hanesan membru CPLP nian, durante ninia Prezidénsia lori ninia Estadus Membrus sira ba debate kona-ba konseitu ne’ebérelasiona ho potensial ekonómiku ne’ebé mosu hosi konstelasaun transrejional ne’ebé namkari ba Europa, Áfrika, Amérikas no Ásia.

“Ita hatene momós hela kona-ba importánsia pás nian ba dezenvolvimentuno, dezenvolvimentu ba pás nian, kuñu ne’ebé sai mos liu tan tanba ita nia empeñu iha atu inklui objektivu da-16º iha Ajenda 2030 nian, ne’ebé ita hotu aprova ona iha tinan ida liu ba. Ita la lika duvida katak: sein pás no estabilidade ita sei labele hanoin kona-ba dezenvolvimentu nomos sein dezenvolvimentu ita lalika hanoin kona-ba pás no estabilidade!,”hatete PM Rui.

Mundu tenke buka hatur beinstár fíziku no moral no dignidade uman iha fatin ida ás liu hosi kualkér interesse hirak seluk. Situasaun refujiadu no migrante nian sira kontinua la hetan solusaun no merese itania atensaun no apoiu. Ita kontinua nesessita solusaun hamutuk ida atu bele halakon situasaun ida ne’ene’ebé afeta ema rihun ba rihun, entre ema hirak ne’e, maka labarik sira.    Presija atu estabelese diálogu polítiku ida franku ho parseria internasionál sira atu bele kontinua respeita direitus umanus no assisténsia umanitária.

Susar boot hirak seluk hakarak atu hatodan mundu.Konflitu sira iha Síria, iha Sudão Sul no iha Iémen, sei dook hosi hetan solusaun. Ita hein katak hatun-kilat foin dadauk iha Síria

bele reprezenta etapa ida hosi dalan ba pás no atu bele kria kondisaun sira ne’ebé bele permiti atu ajuda humanitária sira bele to’o ba iha ema sira ne’ebé depende liu ba ida ne’e ba sira nia sobrevivénsia. Urjente atu iota hamutuk bele hetan solusaun ida ne’ebé bele garante direitu ba autodeterminasaun povu Saharawi no mos atu bele hetan no respeita solusaun ida justu ba aspirasaun hirak lejítimu Povu Palestinu nian.

Timor-Leste, nu’udar país ne’ebé liu ona hosi konflitu ida, nia koñese di’akfolin ne’ebé ás hosi funu no oinsa ita bele tenta atu hasés-an hosi nia ho esforsu tomak, liu hosi diplomasia preventiva no reforsu instituisaun Estadu nian sira.

“Liu fali ami nia kontribuisaun ida ne’e iha ámbitu g7 + nian, ami mos, hanesan uluk ami hala’o tiha ona, hakarak atu integra iha kontinjente hirak seluk no bele fo ami nia kontributu ba operasaun hirak pás nian hanesan forma ida atu agradese komunidade internasional.  Hosi ami nia passadu no hosi ami nia prezente, Timor-Leste bele sai hanesan ezemplu hanesan país ida ne’ebé hit-an sai hosi situasaun konflitu nian ba situasaun ida seluk ne’ebé pás, segurança no estabilidade bele prevalese no benefisia ba ema hotu,”hatete PM Rui.*/avi

Be Sociable, Share!