PR Taur Lakohi Ema Krítika Bei-beik

PR Taur Lakohi Ema Krítika Bei-beik

posted: Monday, September 29, 2014 | 1 comments | 182756 Views

Durante halo viajen iha distritu Baucau hodi halo diálogu hamutuk ho komunidade sira iha kada suku Prezidenti Repúblika (PR), Taur Matan Ruak, kontinua simu krítika husi komunidade sira relasiona ho indultu ne’ebé mak fó ba eis prizioneira Lúcia Maria Brandão Lobato foin lalais ne’e.

Hatan ba krítika sira ne’ebé mak mai husi komunidade iha distritu Baucau, Prezidenti Repúblika, Taur Matan Ruak, ho lian maka’as hateten, katak husu ba identidade tomak atu labele kontinua halo krítika hasoru Prezidenti Repúblika kuandu la hatene.

“Ema ne’ebé lahatene hanoin katak imi sira ne’ebé krítika PR ne’e halo ba Timor liu fali PR, tinan oin ha’u servi rai ida ne’e hamutuk tinan 40. Barak ne’ebé mak koalia ibun boot iha kotuk-kotuk ne’e lahalo buat ida, tanba ne’e Prezidenti lagosta imi krítika integridade Prezidenti nian,” hateten Taur Matan Ruak wainhira diálogu hamutuk ho komunidade iha Aldeia Laumana Suku Letemumu, Sub-Distrtiu Quilicai Distritu Baucau, Sábadu (27/09).

Xefi Estadu ne’e hatutan katak, la’os komunidade deit mak kontinua halo krítika hasoru nia relasiona ho indultu ne’ebé mak nia fó ba Lúcia Lobato, maibé inklui mós Parlamentu Nasional (PN) no sosiadade sivil ne’ebé mak husu Prezidenti Repúblika atu halo esplikasaun ba povu tomak iha rai ida ne’e.

“Sira ne’ebé ibun boot dala ruma ha’u ibun boot liu fali sira, ha’u iha Parlamentu no balu iha liur ne’ebá dehan Prezidenti tenke halo esplikasaun. Ha’u hatete katak ha’u laesplika tanba indultu ne’e konstituisaun fó dalan tanba ne’e lakontra konstituisaun tanba ne’e ba sira ne’ebé mak lahatene no naran koalia deit tenke ba haree iha konstituisaun RDTL,” Taur Matan Ruak hatutan.

Nia hatutan tan, iha balun labrani atu koalia iha oin maibé kontinua hakilar iha kotuk deit, maibé ida ne’e mak demokrasia ema hotu iha direitu atu koalia tuir ida-idak nia hanoin no hakarak maibé antes koalia tenke hanoin didi’ak lai labele halo deklarasaun arbiru deit.

“Jeneral beik ten mak Taur Matan Ruak tanba funu tinan 24 nia laran hetan deit fitun 2, maibé kabun tek barak ne’ebé lahalo buat ida hetan fitun 4 no Prezidenti beik ten mak Matan Ruak halo funu tinan 24 nia laran sei sae kareta Estadu no hela iha uma Estadu ema kontinua trata tan maibé ida ne’ebé lahalo buat ida iha kareta 2 ou 3 hela uma mutin didi’ak deit,” dehan eis Gerrilleiru ne’e.

Taur Matan Ruak mós fó hanoin ba povu TL tomak liu-liu foinsa’e sira ne’ebé mak koalia barak atu sukat liafuan wainhira koalia iha públiku nia oin tenke respeita ema ne’ebé mak hanesan aman ida ba nasaun ida ne’e no ohin loron iha barak mak ibun boot hodi haluha tiha ema sira ne’ebé mak terus ba rai ida ne’e.Reportajen Antónia Maia Gusmão.

Be Sociable, Share!

Leave a Reply

Your email address will not be published.