Deskonfia, Oknum PNTL Proteje Jogu Ilegal PNTL Presiza Provas

Deskonfia, Oknum PNTL Proteje Jogu Ilegal PNTL Presiza Provas

posted: Saturday, September 27, 2014 | 1 comments | 104757 Views

Jogus Lotaria Popular (SDSB/Sumbangan Dana Sosial Berhadiah) ilegal ohin loron, “menjamur” ka namkari buras tebes iha teritoriu Timor laran.

Iha uma tatis balun no balun iha trotoar leten, ema tau kadeira ho mejinha hodi fa’an kupon SDSB ho folin ne’ebe variable.

Kupon mutin SDSB balun fa’an tahan ida ho folin US$ 1.00 no balun fali fa’an ho US$ 0.75. komunidade ne’ebe notabene kbi’it laek, dala wain monu lalais deit ba tentasaun jogus SDSB ne’e tanba fiar ba sorte katak, hasai US$ 0.75-US$ 1.00, bele “rebenta” to’o US$ 2.000,00.

Jogus Lotaria Popular ne’e mos iha kompanhia nasional rua mak loke legalmente, hanesan RUDAL ho Luz Clarita. Maibe, ida ne’ebe “menjamur” maka’as liu to’o suku no aldeias sira iha teritoriu Timor tomak mak SDSB illegal Singapura nian.

Kuaze iha distritu hotu, jogus 4D Singapura ne’e domina. Komunidade sira mos antosias sosa kupon mutin 4D Singapura nian, tanba sira fiar SDSB Singapura ne’e la manobra no fasil tebes asesu iha internet. Entretantu, jogus SDSB legais ne’ebe Timor oan sira loke ne’e mos diak, mas komunidade sira sei duvidas, tanba sira nunka kona no sira diskunfia jogus SDSB ne’ebe empreza Timor oan sira loke lagal ne’e fasil atu manipula malu.

Iha informasaun ibun ba ibun dehan katak, jogus lotaria ilegais 4D Singapura kontunia ejiste no “menjamur” iha Timor Leste, tanba asegura husi membru PNTL balun. Basa, iha realidade jogus ilegais ne’e fa’an malorek iha dalan ninin no uma tatis ou kios laran, maibe la iha autoridade seguransa mak bele halo kapturasaun.

Ironia liu tan, negosiantes sira ho tiga roda sira ne’ebe mak okupa deit trotoar hodi buka moris no la kontra bandu, mas governu hasai deklretu lei ministerial nian hodi hasai obrigatoriu no balun ne’ebe ulun to’os polisia lori forsa ba atua. Maibe, jogus ilegais 4D Singapura ne’ebe mak “buras” iha sosiedade ida ne’e, mas polisia sira balun haree hela deit.

PNTL Presiza Provas

Komandante Operasaun Nasional PNTL, Superintendenti Xefi, Armando Monteiro, husu ba komunidade hotu atu koopera ho PNTL hodi aprezenta prova kona-ba membru PNTL sira ne’ebe mak asegura lala’ok jogus ilegais, hanesan SDSB ho bola guling.

“Se karik elementu individu PNTL mak mete atividade illegal, lalika subar, karik media ka komunidade mak hetan, ami presiza nia provas, hanesan foto grafia no bele halo gravasaun hodi nune’e bele prosesu, tanba iha Instituisaun nunka hanorin atu mete ba aktividade illegal ida ne’e, justru Polisia mak atu kombate aktividade illegal ida ne’e,” afirma Armando Monteiro ba Jornalista iha Salaun CAVR foin lalais nee.

Kona fali ba atividade artemarisias balun komesa treinu sub-subar fali ona iha Distritu Baucau, Armando Monteiro, klarifika katak, ne’e sei hanesan informasaun. Tanba ne’e, polisia presiza dezenvolve atu bele komprova informasaun ne’e los ka lae.

Iha parte seluk Sekretariu Estadu Seguransa (SES), Francisco da Costa Guterres dehan, hori uluk nia husu keixa husi komunidade, tanba agora   ne’e Ministerio Turismu mak fo lisensa ba jogus lLotaria Popular.

“Ami sei hare fila fali, ne’e mak ami halo hela razia sei lao hela. Tanba uluk ami kaer ema balun no balun lori ona ba Tribunal,” hateten SES Francisco da Costa Guterres.

Governu Susar Kontrola Jogus Ilegal

Antes nee mos Ministeriu Comerciu Industria no Ambiente (MCIA) ho poder tomak legaliza aktividade jogus lao iha rai laran, maibe nia parte mos susar atu kontrolu, nune’e jogu ilegal mosu barak liu tan.

Inspektor Jeral do Jogos iha MCIA, Miguel dos Santos Lobato esplika, MCIA legaliza ona jogu lotariadu haat, rua husi Singapura no rua seluk husi nasional.

Maibe nia informa, iha mos jogu ilegal barak mak ejisti iha kapital Dili hanesan jogu makina, lotaria husi Singapura, Bola Guling no seluk tan, maibe MCIA laiha kompetensia atu kaptura ne’e so PNTL.

“Ita halo kontrolu ba jogus ne’e susar lahalimar, mesmu ho policia mos labele, tanba ne’e ami foti desizaun diak liu legaliza tiha para sira selu taxa, maibe balun uza oportunidade ne’e loke jogu ilegal bar-barak,”informa Miguel Lobato.

Desde kompania lotaria haat hahu iha tinan 2009 sira kontribui ona osan miloens ba miloens ba Governu.

Nia esplika, kada fulan lotaria kontribui $100 mil ba kofre estadu liu husi selu taxa. Kompania direitamente ba selu iha banku liu husi numeru PIN ne’ebe MCIA fo depois mak lori resivu ba inspektor jeral dos Jogus.

“Jogos de makina ida ne’e ami halo tiha ona revizaun ba dekretu lei ho numeru 9 ne’ebe iha ona gabineti Prezidenti Republika atu halo promulgasaun tanba Conselho Ministro aprova tiha ona tanba sei bele ita halo ba estranjeiro deit tanba agora mos jogos makina lao hela iha kapital Dili ne’ebe ami detekta ona ida iha PARTE Comoro nian, ida iha parte Fatu Hada, ida iha Bemori no ida iha Tropical,” tenik Miguel

Osan obriga ema atu halo saida deit hodi hetan osan tanba ne’e mesmu governu bandu ona atu ema loke jogu ilegal maibe realidade jogus ilegal kontinua iha no barak liu tan, ne’ebe MCIA rasik labele identifika krimi ekonomia refere. Mesmu iha inisiu MCIA ho PNTL halo ona kooperasaun atu klontrola hodi kaptura, maibe to’o agora PNTL mos lahalo buat ida.

Miguel mos hatete, benefisio ba jogus ilegal mak sira bele hetan osan barak no laselu taxa, maibe ema sira sosa bainhira manan tiha ho montante bo’ot, maibe sira laiha osan atu selu. Ida ne’e ita labele koalia barak, tanba lalegaliza.

Tuir regulamentu, kompania sira bele loke aktividade komesa husi Segunda to’o Sesta, maibe kompania Singapur loke too Sabado no Domingo ho razaun atu nune’e osan labele halai hotu ba kompania ilegal sira ne’ebe la selu taxa. JNDiario

Be Sociable, Share!

Leave a Reply

Your email address will not be published.