Sesaun Solene Ba Terseiru Lejislatura, PR Taur Husu PN Aselera Lei Prioriedade Hat

Sesaun Solene Ba Terseiru Lejislatura, PR Taur Husu PN Aselera Lei Prioriedade Hat

posted: Tuesday, September 16, 2014 | 4365 comments | 7819 Views

Prezidenti Repúblika (PR) Taur Matan Ruak husu ba Parlamentu Nasional (PN) atu aselera diskute no aprova lei prioridade hat (4), kompostu husi Lei Anti Korupsaun, Pensaun Vitalisia, Terras propriedade, no Lei Protokolu Estado nian.

“Ita nia instituisaun sira kontinua atu konsolida no dezenvolve sira nia a’an, Lei importante sira kontinua tama iha faze preparasaun no revizaun. Hau husu ba Parlamentu Nasional no ba Governu atu fo prioridade ba lei sira ne’e, espesalmente entre outros, lei anti korupsaun, lei pensaun vitalisia, lei konaba rai, no lei konaba protokolu Estado,”Prezidente Repúblika (PR), Taur Matan Ruak, deklara asuntu ne’e wainhira loke serimonia solene ba terseiru legisltiva iha PN, Segunda, (15/09) horseik.

Xefe estado taur Matan Ruak afirma, Lei ne’ebe refere nudar lalenok ba realidade rai Timor, tanba ne’e importante duni fo prioridade ba divulgasaun ba lei sira ne’e.

“Imporante mos katak lei sira ne’e sai nudar lalenok ba ita nia rain nia realidade. Inisiativa legislativa balu la reflete ita nia realidade sosial, kultura no iha kazu sira ne’e, la kontribui atu hakbesik sistema legal ba sidadaun sira. Presija atu fo prioridade ba divulgasaun kona-ba lei sira iha komunidade nia le’et, oinsa mak ita bele hein katak sidadaun sira kumpre lei sira se ita la fo meius ba sira atu konhese lei sira ne’e, ita tenke avansa ho lalais iha tradusaun ba lei sira, hahu husi lei sira ne’ebe mak iha impaktu direito liu ba iha ema nia moris loron-loron,”PR taur afirma.

Prezidenti Taur fo ezemplu katak, wainhira lei anti korupsaun implementa ona sei garante ba servisu orgaun justisa ninian hodi investiga no julga kazu korupsaun.

“Kombate hasoru korupsaun tenke hetan refosu, no lei anti korupsaun sei garante kualidade bo’ot ba projeto no serbisu sira Estado nian no hamosu instrumentu foun sira ba justisa hodi investiga no julga kazu sira korupsaun nian. Korupsaun ne’e halo tohik Estado no halo fraku Nasaun, tanba dezenkoraja investimentu esternu no hamosu instabilidade institusional,”afirma PR Taur.

Maske nune’e Eis Xefi Estado Maior General Falintil-Forsa Defeza Timor-Leste (F-FDTL) ne’e, husu ba serbisu investigasaun kriminal no tribunal atu mantein nafatin servisu ho independensia.

“Servisu investigasaun kriminal no tribunal sira tenke sai firme hasoru korupsaun no tenke serbisu ho independensia no sein iha interferensia,”akresenta PR Taur.

Iha sorin seluk Prezidenti Parlamentu Nasionál, Vicente Guterres agradese ba disponibilidade Prezidenti Repúblika, Taur Matan Ruak nian hodi loke serimonia solene terseira lejilativa ne’e PN sente honra bo’ot ho prezensa Xefi Estadu no nia partisipasaun iha serimonia refere.

“Ami sente honra ho ita bo’ot nia prezensa iha ne’e (PN-red) hodi loke abertura terseira sesaun lejislativa da terseira lejislatura,”dehan Prezidente PN, Vicente Guterres.

Nune’e mós Vice Prezidente PN, Aderito Hugo da Costa, afirma, serimonia hanesan tinan-tinan hala’o ne’ebe abertura primeiru ano halao iha tinan 2012 lejislativa iha 30 de Jullho no segundo ano halao iha tinan 2013 ne’ebe Prezidente, Taur Matan Ruak mak loke serimonia ne’e.

Partispantes iha serimonia ne’ebe refere kompostu husi, Primeiru Ministru (PM), Kay Rala Xanana Gusmão, Prezidente Tribunal Rekursu (TR), Guilhermino da Silv, Prokuradoria Jeral da Repúblika (PJR), José da Costa Ximenes, eis titulares orgaun soberania sira hanesan, eis Prezidente Repúblika, José Ramos Horta, eis Prezidente Parlamentu Nasional, Francisco Guteres “Lu-Olo” no eis Primeiru Ministru, Marí Alkatiri inklui membru governu balun. may/dgx

Be Sociable, Share!
(Visited 1 times, 1 visits today)

Leave a Reply

Your email address will not be published.