FALINTIL Liman Kroat Povu Nian – PR Taur Lansa Livru A Luta Armada Timorense

FALINTIL Liman Kroat Povu Nian – PR Taur Lansa Livru A Luta Armada Timorense

posted: Saturday, September 13, 2014 | 1 comments | 273071 Views

Força Armada da Libertação Naçional de Timor-Leste (FALINTIL) sai hanesan liman kroat povu nian hodi ejiste no luta kontra invazor ne’ebe konsege liberta nia rain no nia povu.

Iha aniversariu FALINTIL ba dala-39, Kuarta (20/8/2014), eis komandante guereleiru FALINTIL atual Komnandante FALINTIL-Força Defesa Timor-Leste (F-FDTL), Maijor Jeneral Lere Anan Timur, reafiarma katak, loron FALINTIL ne’e importante la’os deit ba instituisaun F-FDTL ho nia membru tomak, maibe importante mos ba povu hotu iha Timor Leste.

“Povu nia liman kroat mak ho FALINTIL hodi ita konsege liberta ita nia rai ho ita nia povu,” afirma Lere Anan Timur, hodi responde jornalista wainhira partisipa serimonia aniversariu FALINTIL ba dala-39 iha Palacio do Governo, Dili.

Lere mensiona dehan, tinan 24 nia laran iha ai-laran, forsa guereleiru FALINTIL la iha lei mak regula sira, maibe komandante ida-idak ho nia inisiativa no taktika armada nian bele komanda nia forsa hodi infrenta funu hasoru invazor.

Maske la iha Lei no regulamentu militar nian, Lere hateten, asuwain FALINTIL sira disiplinadu no responsabilidade hodi kumpri ordem komando da luta nian no respeita tebes ba superior sira.

“Ohin loron diferensia boot, tanba ita iha ona lei no iha ona regulamentu militar nian. ita foin mak harii ita nia nasaun no harii ita nia ezersitu hodi oinsa mak bele sai professional,” hateten Lere Anan Timur.

Husi sorin seluk, eis komandante Falintil, Corneli Gama alias L-7 hateten, selebrasaun loron FALINTIL ne’e atu hanoin hikas atu oinsa mak bele halo dezenvolvimentu ba rai doben ida ne’e.

“Ami FALINTIL, ema dehan hanesan ne’e, uluk parte balun istoria ninian, balun kaer kilat, depois hotu-hotu kontente, maibe agora joven barak ida ne’e diak ba futuru, ida ne’e ami kontente,” hateten Komandante L-7.

Lansa livru A Luta Armada Timorense

Hafoin preside tiha serimonia aniversariu FALINTIL iha Palacio Governo, Prezidente Republika (PR), Taur Matan Ruak,ofisialmente lansa livru aluta armada Timorense na rejistennsia okupasaun 1975 -1999.

Seremonia lansamentu livru istoriku   ne’e asiste mos husi Primeiru Ministru (PM) Kay Rala Xanana Gusmão, no membru Governu, membru Parlamentu Nasional ho mos bainka dipolomatiku sira.

Livru ne’e produs iha Portugal ne’ebe hakerek husi matenek nain nain tolu, Abilio Pires Luosada, Antonio Jose Oliveira ho Carlos Dias Afonso.

Livru ne’e fa’an ho nia folin US$ 30.00, nudar primeira faze ba forsa armada ninia taktika, estratejia, sofrementu ho inisiativa ne’ebe mak asuwain FALINTIL sira halo.

“Ami rasik mak kaer ho liman, ami rasik mak halo funu haruka hakerek livru ida ne’e, ida ne’e la bosok,” afirma Lere Anan Timur ba jornalista.

Lere dehan, ema estranzeiru barak mak mai iha nasaun Timor Leste to’o fulan ida ka rua hanesan ne’e sira komesa hakerek istoria rai Timor ninian, entaun buat barak mak la kona ema nia laran.

“Surat ne’ebe mak halo ne’e dala ruma iha erru ruma iha, maibe bainhira iha falha ruma husu ba leitor sira atu fo hatene, ami bele kuriji, memoria ita sempre haluha, tinan barak ona ita bele haluha data no haluha ema balun, ne’e para ita bele hadia,” hateten Lere Anan Timur.

Livru ne’ebe mak produs ne’e laos ema hotu mak tau nia hanoin, maibe hakerek dor Portugal, militar ho Presidente Republika Taur Matan Ruak, ne’ebe mak uluk sei asumi kargu hanesan Maijor Jeneral F-FDTL no Maijor Jeneral Lere mak tau hanoin hamutuk hodi produs livru refere.

“Ita dehan livru ida ne’e muintu rezumiku, la kompletu, mais sufisente atu eduka ita nia jerasaun foun sira. Ami la bele inventa, se’e hau oho ema 10 dehan 10, se’e hau la oho ema, entaun dehan la oho ema, ne’e realidade. Se’e ema seluk mak halo ne’e dehan ideas ka inventa,” hateten Lere Anan Timur.

Xefi Estado Maior F-FDTL, Koronel Falur Rate Laek fo sasin katak, livru ne’ebe mak produs ne’e uza osan hamutuk US$ 170 ital mil. Husi osan sira ne’e laos orsamentu Estadu, maibe orsamentu partikular.

“Hau rona husi kaza militar hateten katak, osan   ne’ebe mak gasta 170 ital mil hodi halo viazen ba mai, halo alojamentu depois promosaun husi makina sira ne’e hamutuk kal 70 mil ka 80 mil,” informa Falur Rate Laek.

Iha fatin hanesan Ministru Edukasaun (ME), Bendito Freitas, ne’ebe mak mak asisti hotu iha seremonia lansamentu ne’e, sublinha katak, produsaun livru ne’e fo sasin kmanek ba luta no terus ne’ebe mak heroi no kombatente sira infrenta iha faze ida defisil tebes.

“Produsaun livru ne’e sai hanesan instrumentu ida ba referensia istorika ba valores nasional, ba valores luta prolongadas para jerasaun ne’ebe mak tuir mai ne’e bele iha konhesementu atu hametin sira nia esperitu nasionalismu ne’e rasik,” hateten Bendito Freitas. nax

Be Sociable, Share!

Leave a Reply

Your email address will not be published.