Prizaun Preventiva Ba MM-LB La Iha Limite

Prizaun Preventiva Ba MM-LB La Iha Limite

posted: Monday, March 17, 2014 | 1 comments | 776 Views

L-7 Ho Matak Cs Hetan TIR

Liu husi audensia primeira interogatoriu iha Tribunal Distrital Dili (TDD), Sabadu (15/3), Juis Singular Jose Maria de Araujo, aplika medida kuasaun prizaun preventiva ba komandante Konselhu Revolusaun Maubere (KRM), Paulino Gama “Mauk Moruk (MM)” ho komandante Labarik Maia (LM).

                Ho desizaun Tribunal nian ne’e, iha tuku 17:30 Otl, loraik neba kedas, polisia lori MM ho LB ba hela iha Prizaun Becora la iha limite, hodi sai mos hanesan bainaka foun iha sala nain sira nia ain fatin hodi hein prosesu kontinausaun justisa nian.

                Husi sorin seluk mos Tribunal deside Termo Indentidade Residençia (TIR) ba eis Segundu Komandante FALINTIL Regiaun III, Cornelio Gama “L-7” ho mos membru CPD-RDTL, Antonio Aitahan Matan (ATM), Gil Fernandes (Gil FERDES), ho tan member CPD-RDTL nain 10 seluk tan ne’ebe polisia kaptura iha Distritu Aileu, foin lalais ne’e.

Mauk Moruk. L-7, Komandante labarik, Antonio Aitahan Matak inklui sira seluk to iha tribunal oras 13.46 OTL ho kareta Prado numeru matrikula 03.634 G, akompanha husi komandante PNTL Distritu Dili  Superetendenti Xefi Pedro Belo no hetan seguransa maximu husi membru PNTL ne’ebe ho armas kompeltu.

Iha audensia primeiru interogatoriu ba MM, L-7, Labarik Maia, ho grupu CPD-RDTL ne’ebe lidera husi Antonio Aitahan Matak ne’e, hetan siguransa metin. Polisia bandu komunidade sira la bele tama ba tribunal hodi asiste primeira interogastoriu ne’e, inklui jornalista sira.

Komunidade ho simpatizante Komandante KRM, Mauk Moruk nian la bele besik ba Tribunal no tenke asiste hodi hamrik deit iha Estrada ninin Tribunal nia oin.

Polisia  husi Unidade Bataliaun Ordem Publiku (BOP) ho Task Force tuba metin iha linha Tribunal nian oin hodi fo seguransa ba audensia primeira interogatoriu ba Mauk Moruk, L-7 ho grupu CPD-RDTL.

Advogadu privadu MM nian, Paulo Remidios, informa katak, nia klente MM ho LB hetan prizaun preventive. Loron no fulan prizaun preventive ba MM ho LB la iha limite tuir desizaun Tribunal nian. masker nune’e, Paulo Remidios sublinha katak, desizaun tenke estuda no iha posibilidade atu hatama rekurus ba Tribunal Rekursu (TR).

Advogadu Paulo Remedios, ne’ebe reprezenta mos Aitahan-Matak hatete, Aitahan Matak la komete krime, maibe iha diferensia atu koalia klaru. Tuir nia, arguido hirak ne’e la komete krimi, tanba TDD rasik seidauk desidi sira komete krime.

“Ema hotu seidauk komete krime, Aitahan Matak ho nia camarada sira hamutuk nain 12 liberdade, seidauk iha julgamentu,” informa Paulo Remidios ba jornalista sira hafoin akompanha primeira interogatoriu ba MM, L-7, LB ho Aitahan Matak Cs.

Nia klarifika katak, ba sira ne’ebe hetan TIR, investigasaun sei kontinua halao ba sira, wainhira hetan evidensia foun ruma iha posibilidade halo tan julgamentu ba sira.

Husi sorin seluk, Pedro Aparicio Guterres, nudar advogadu komandante L-7 nian informa katak, nia kliente L-7 hetan deit TIR ne’ebe nia iha uma. Maibe, sema-semana tenke aprezenta-an ba polisia.

“Hau nia kliente L-7 fila ona ba nia uma ita sei hein kontinuasaun prosesu husi Ministeriu Publiku,” hateten advogadu Pedro Apariçio Guterres.

Mauk Moruk ho L-7 intrega an ba polisia iha uma Fatuhada, Dili, Kinta (13/3), no Komandante Labarik Maia, polisia kaptura iha nia baze apoiu iha Manleuana.

Antonio Aitahan Matak ho Gil FERDES intrega an voluntariamente ba polisia iha Sesta dader (14/3), tantu elementus CPD-RDTL nain 10 seluk hetan kapturasaun husi polisia iha Distritu Aileu.

Iha audensia primeira interogatoriu ne’e preside husi Juiz Singular Jose Maria de Araujo, Ministeriu Publiku (MP) reprezenta husi Prokuradora Angelina Saldanha ho Prokurador Felismino Cardoso. Tantu, arguido sira hetan asistensia legal husi sira nia advogadu privadu, Paulo Remidios ho Pedro Apariçio Guterres. Lia

Comments

One Response to “Prizaun Preventiva Ba MM-LB La Iha Limite”
  1. mmmmimmm says:

    copera diak ho estado MM no /LB

Leave a Reply

Connect with:

Your email address will not be published.

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>