CNRT Mak Iha Direitu Hili PM Foun

CNRT Mak Iha Direitu Hili PM Foun

posted: Friday, January 31, 2014 | 815 comments | 12986 Views

Lider opozisaun FRETILIN, Francisco Guterres ‘Lu-Olo’, hateten katak, partidu CNRT mak iha direitu atu hatudu Primeiru Ministru (PM) foun hodi troka Primeiru Ministru (PM) Kay Rala Xanana Gusmão, wainhira rezigna-an.

Tanba laiha posibilidade atu forma VI Governu.

No kuandu forma VI Governu bele akontese eleisaun antisipada.

Maibé kuandu iha eleisaun antisipada Lu-Olo mós dehan, presiza lori tempu naruk.

Tanba ne’e, Lu-Olo prefere, partidu mais votadu iha bloku koligasaun bele hatudu ema ida hodi kontinua pasta PM para kaer metin estabilidade polítika.

“Laiha posibilidade atu forma VI Governu, tanba ne’e lori tempu naruk no ne’e bele akontese aleisaun antisipada, nune’e bloku koligasaun partidu mais votadu CNRT bele hatudu ema ida hodi bele ba kaer Pimeiru Ministru (PM) hodi bele kaer metin nafatin estabilidade polítika”, hateten Lu-Olo ba Jornalista sira, hafoin partisipa debate sobre Pretendida Rezignasaun Primeiru Ministru (PM) Kay Rala Xanana Gusmao, iha Hotel Timor (HT) Dili Kinta (30/1).

Lu-Olo akresenta katak, Dr.Mari Alkatiri ho Sr. Primeiru Ministru Kay Rala Xanana Gusmao sempre la’o hamutuk ne’e la’os sira na’in rua mak influensia ba malu hodi PM Xanana rezigna-an.

Maibé ne’e desizaun PM ninia rasik hodi husu no hakarak rezigna-an.

Tanba iha konstituisaun artigu 12 alina b ne’e preve katak, PM bele husu nia rezignasaun nune’e rezignasaun ida ne’e naturalmente sei iha subtituisaun.

Eis Prezidenti Parlamentu Primeiru no Segundu Lejislatura ne’e esplika katak, sé partidu mais votadu CNRT labele hatudu ida ba PM, entaun Konsellu Estadu sei fó konsellu ba Prezidenti da Repúblika atu bele desidi ho lia fuan ikus ne’e oinsa.

Tuir informasaun ne’ebé espalla iha públiku katak, PM Xanana rezigna-an FRETILIN mós tama iha membru Governu, Lu-Olo afirma, FRETILIN hakarak atu kontinua opozisaun deit no FRETILIN tenki fó respeita nafatin ba partidu bloku koligasaun ne’ebé mak mais votadu atu hili ninia Xefi Governu foun.

“Ami labele ejiji fali ba ami nia-an hodi ba fera fali iha ne’eba ne’e labele.

Maibé ema iha koligasaun ida ne’ebé iha ami respeita tebe-tebes ita nia konstituisaun Governu ida ne’ebé manan sira forma tuir sira nian no ami respeita tebe-tebes tantu ami labele adianta ami labele hakat rua hakat tolu dala ida deit”, Lu-Olo fundamenta.

Aktual Prezidenti Partidu Frente Revolusionária Timor Leste Independenti (FRETILIN) ne’e akresenta katak, FRETILIN kontinua koopera ho Governu hodi garante ba paz no estabilidade nasionál, atu lori rai ida ne’e ba oin.

Iha fatin hanesan Eis Vise Primeiru Ministru (VPM) IV Governu Konstitusional Eng. Mário Viegas Carrascalão esplika katak, Xanana rezigna-an ne’e polítika estratéjiku ida ne’ebé mak Xanana iha desde luta to’o mai ukun rasik-an.

“Ha’u la haree PM Xanana moras mak atu sai hodi rezigna-an, ha’u la haree PM Xanana halo buat ida sala nune’e ema hakarak duni nia sai husi ne’eba, ha’u la haree tan ba kestaun legál ne’ebé iha programa Governu hetan aprovasaun mak nia tenki husu nia rezignasaun. La’os ida ne’e, maibé sai nonok deit ne’e polítika estratéjiku ida Xanana nian”, hateten Mário Carrascalão.

Nia dehan, Xanana Gusmao ne’e hanesan lider movimentu libertasaun nasionál ne’ebé luta ba independénsia Timor nian ho promesas atu lori moris ida ne’ebé di’ak liu ba povu Timor Leste.

“Maibé liu tiha tinan 12, nia promesa ne’e la konsege kumpri.

I nia rasik sai Prezidenti da Repúblika (PR) la konsege halo saida mak nia ideias ne’e no nia sai tiha husi Prezidenti da Repúblika (PR) ninia partidu hetan Primeiru Ministru (PM), maibé ho modellu ezekutivu nia la konsege mesak nune’e nia tenki halo koligasaun ida ho naran Aliansa Maioria Parlamentar (AMP) la susesu hanesan buat balun la’o no buat balun la la’o”, hateten Carrascalão.

“Partidu barak ne’ebé tama iha AMP ne’e barak mak lahetan fatin entaun halo fali koligasaun ida hodi forma tan V Governu Konstitusionál.

Ne’e dala ikus liu ba PM Xanana atu konsege konkritiza saida mak nia hanoin no nia maluk sira nia hanoin, bainhira kaer kilat ariska sira nia vida atu luta ba ita nia independensia ne’e”, tenik Carrascalão.

Tanba ne’e Carrascalao akresenta katak, rezignasaun PM Xanana ne’e sikuensia husi promesas ne’ebé mak nia lakonsege realiza durante iha nia governasaun.alm

Be Sociable, Share!

Leave a Reply

Your email address will not be published.