Kazu CMATS, Sosiedade Sivil Fiar TL Sei Manan Austrália

Kazu CMATS, Sosiedade Sivil Fiar TL Sei Manan Austrália

posted: Wednesday, January 29, 2014 | 1606 comments | 23182 Views

Director Ezekutivu Forum Organizasaun Não Govermental Timor Leste (FONGTIL), Alcino Pereira fiar katak, kazu Certain Maritime Arrangement Timor Sea (CMATS), ne’ebé maka julga dadaun iha Tribunál Internasionál Arbitrajen, Deng Haag, Holanda Timor Leste (TL) sei mana Austrália.

“Ha’u nia haree katak buat sira ne’e tuir lei Anklos nian tuir buat sira ne’ebé que iha politikamente Timor Leste sei manan,”dehan Director Ezekutivu FONGTIL, Alcino Pereira ba Jornalista sira iha nia servisu fatik Caicoli Dili, Tersa, (28/01).

Hanesan sosiedade sivil iha Timor Leste no hanesan mós Timoroan sei nafatin fó apoiu ba estadu no Governu tanba Timor Leste hanesan soberania ida ne’ebé maka iha direitu atu koalia sobre median line ba fronteira tasi ninian.

“Ha’u hanoin klaru tebes pozisaun NGO Forum nian ne’e tenki apoia tanba ne’e soberania de estadu, ita atu koalia konaba median line ga ita atu koalia konaba tasi Timor ga saida deit ne’ebé maka partense ba Timor ne’e ha’u hanoin la’os NGO forum deit maibé povu Timor Leste tomak, ha’u hanoin atu defende ida ne’e nu’udar estadu de soberania, tanba ne’e ha’u hanoin hotu-hotu tenki apoiu ba estadu no Governu ba kazu ne’ebé maka oras ne’e dadauk iha Tribunál arbitrajen Deng Haag,”Alcino Pereira afirma.

Maske nune’e Diretur Ezekutivu FONGTIL ne’e nota dokumentus balun liu husi internet katak, presiza analiza didi’ak tanba liña ne’ebé maka halo ona ne’e depende liña ne’ebé maka Indonesia no Austrália halo antes ne’e wainhira Indonesia halo invade iha Timor Leste. Maske liña ne’ebé halo tuir liña ne’ebé maka Indonesia no Austrália desidi ona maibé nia fiar katak buat ne’ebé Timor nian, sei nafatin Timor nian.

“Ha’u mós haree ida dokumentus balun ne’ebé ha’u haree iha internet liu-liu halo liña sira ne’e maka ha’u lahatene tanba ida ne’e presiza analiza mós klean tanba sira halo liña ne’e patokan husi Indonesia no Austrália i ita hatene katak ida ne’e uluk negosiasaun Indoneisa no Austrália la’o tiha ona entaun ida ne’e maka ita nia estadu tenki haree sasan sira ne’e, agrimentu sira ne’ebé ke halo, kontratu sira ne’ebé ke halo ho Austrália ne’e ita tenki estuda halo klean mas ha’u fiar katak ida ne’ebé maka partense ba Timor nian, ita sei manan, ita sei manan Australia,”nia argumenta.

Alcino Pereira dehan, hanesan sosiedade sivil Timoroan sei nafatin apoiu ba Governu no Estadu Timor Leste hanesan soberania ida hodi defende direitu povu no nasaun nian.

Alénde ne’e relasiona ho asaun ne’ebé maka Intelijensia Nasional Australian (ASIO) halo ba sasin Timor Leste nian, Bernard Colaerd hodi sita dokumentus konfidensial sobre espionajen ne’ebé Austrália halo ba Timor Leste, FONGTIL hamutuk ho nia membru sira halo ona karta konjunta ida hodi haruka ba Primeiru Ministru (PM), Tonny Abott iha fulan Dezembru tinan kotuk (2013) liu husi embaixada Austrália iha Timor Leste.

Nia esplika, kontiudu husi karta ne’e maka atu husu Governu Austrália hodi respeita soberania Timor Leste nian, fó fila dokumentus ne’ebé Intelijensia sira prende no hapara espionajen ne’ebé maka halo ba Timor Leste.

“Kontiudu ne’e maka sira tenki respeita soberania i sira tenki hateten tanba saida maka sira foti fali ita nia dokumentus ne’ebé atu suporta ita iha Tribunál Arbitrajen liu husi ita nia advogadu, ida ne’e no mós espionajen, sira hanesan nasaun boot ida sira tenki respeita nasaun ki’ik,”esplika Alcino Pereira.

Alcino Pereira haklean katak, maske karta ne’e haruka ona ba Governu Austrália maibé Governu Austrália seidauk fó resposta ruma sobre kestaun sira ne’ebé maka sosiedade sivil levanta.

Alcino Pereira esplika katak, sobre kazu intelijensia Austrália nian ne’ebé maka sita dokumentus konfidensiál iha Câmbera Austrália iha dia 3 fulan Dezembru tinan kotuk (2013) Timor Leste hato’o keixa ba Tribunál Internasionál Justisa (TIJ) atu ejiji ba Austrália hodi fó fila dokumentus hirak ne’ebé maka Austrália sita sobre Certain Maritime Arrangement Timor Sea (CMATS).

Nune’e iha loron hirak liu ba julga ona husi TIJ iha Deng Haag, Olanda maibé Austrália defende no seidauk fó fila dokumentu hirak ne’e, maibé Australia promte la book dokumentu sira ne’ebé intelijensia sira prende.

Antes ne’e Primeiru Ministru (PM) Kay Rala Xanana Gusmão husu ba sosiedade tomak atu hamutuk hodi fó apoiu ba Governu para defende direitu povu Timor Leste nian.dgx

Be Sociable, Share!

Leave a Reply

Your email address will not be published.