PM Xanana Rezigna-An Atu Lidera Planu Integradu

PM Xanana Rezigna-An Atu Lidera Planu Integradu

posted: Wednesday, December 18, 2013 | 420 comments | 11418 Views

Primeiru Ministru (PM) Kay Rala Xanana Gusmão informa katak, nia deklara rezigna an husi Governu, iha tinan 2015 oin mai, tanba atu lidera planu integradu.
“Ami ses-an atu tau matan ba desentralizasaun mós, sira tau matan iha buat seluk, ha’u tau matan iha planeamentu integradu, hodi sentraliza,”afirma PM Xanana ba Jornalista liu husi nia diskursu bainhira partisipa iha diskusaun kona-ba partisipasaun juventudi ba estabilidade iha Comoro-Dili, Tersa, (17/12).
Xanana dehan, agora ne’e la’os tempu atu hadau malu kadeira maibé, tempu atu dezenvolve rai ida ne’e no hadia povu nia moris.
Tanba tuir Xanana, povu Timor Leste (TL), ohin loron hakarak han deit supermi ho fós Vietnam. I han hotu tiha moras ataka.
Maibé kompara ho tempu uluk, dehan Xanana, iha ai laran han deit talas ho batar, to’o agora sei forte nafatin.
Xanana koalia katak, Ramos Horta depois fila fali mai, nia mós sei hetan fali nia kna’ar ida fora de instituisaun Estadu, hodi bele diskuti ho instituisaun hot-hotu konaba TL nia problema.
“Ha’u husu ba Consellu Nasional Juventudi Timor Leste atu tau matan no buka, demokrasia ne’e la resolve buat hotu iha mundu tomak. Tanba demokrasia ne’e ohin loron iha Portugal hemu bee, hanesan mós Espanha, Grecia , Italia no França,”esklarese Xanana.
Tuir Xefi Governu ne’e katak, Demokrasia ne’e la’os atu hakilar deit, tanba ida ne’e mak partisipasaun juventudi ne’e hodi promove estabilidade.
Xanana esplika tan, TL lobi tiha ona ho nasaun G7+, konaba oinsa mak doador sira bele ajuda rai ida, labele hein deit ema atu fó ninia ajuda mai.
“Uluk ita konsege unidade nasionál hasoru inimigu ida, maibé ohin ita la konsege unidade nasionál, tanba ita hasoru ita nia inimigu bo’ot teb-tebes mak ita nia-an rasik. Tanba ida ne’e horikalan ami koalia hodi asenta hanoin konaba ha’u atu sai,”dehan Xanana.
Xanana akresenta tan katak, iha enkontru ne’ebé realiza entre Ramos Horta, Alkatiri, Lu-Olo ho nia parte rasik (Xanana,red), koalia konaba sira nian papél agora ne’e saida.
“Agora ha’u Primeiru Ministru, depois 2017 ha’u nia membru governu sira halo sala barak, FRETILIN manan fali, Dr. Mari ba fali Primeiru Ministru, depois ba to’o iha ne’eba problema karik, nune’e CNRT manan fali ha’u mak ba fali. Ida ne’e mak ami nia papél agora. Ami husu ba malu hanesan ne’e iha enkontru ne’e,”esplika Xanana.
Ne’eduni Xanana haklaken katak, to’o ona tempu ba sira lideransa tuan atu sai, hodi fó fiar ba jerasaun foun. Tanba ne’e mak Xanana dehan antes atu sira sai, sira sei provoka situasaun ho intelektuais sira agora hodi buka atu komemora.
“Ne’emak ami dehan ba malu katak la’e, ita nia papél agora ne’e la’os tuur kadeira. Ami na’in hat nia papél ses-an hodi forma lideransa foun, la’e ita nia rai sei monu,”relata Xanana.
Xanana koalia katak, hanoin dezenvolvimentu ho polítika sira ne’ebé halo dadauk ne’e, no hanoin ona atu haree katak, oinsa mak bele la’o ba oin.
“Ida ne’e atu husu ba ita katak, iha hanoin naruk ida, ne’ebé ita fiar katak, ida ne’e mak lós, ita hotu kaer deit ida ne’e. Tanba agora ne’e ita iha ona planu estratéjiku, tanba ne’e ita tenki ke’e, sala ne’e oinsa mak ita implementa tan ida ne’e,”tenik Xanana.
Xanana esplika katak, predeskontrasaun ne’e, atu prepara ema, tanba Timor nia problema bo’ot liu iha Timor nia kultura no sosiedade, mak administrasaun finansas.
Tanba ne’e Xanana dehan, joven sira tenki promove estabilidade tanba laiha paz, osan atu barak to’o iha ne’ebé, sei la halo buat ida ba nasaun ida ne’e.tap

Be Sociable, Share!

Leave a Reply

Your email address will not be published.