Mari Alkatiri : Projetu Master Plan Sei Ilegal

Mari Alkatiri : Projetu Master Plan Sei Ilegal

posted: Monday, November 25, 2013 | 3285 comments | 41516 Views

Projetu Pilotu Master Plan zona ekonomia especial nebe eis Primeiru Ministru, Dr. Mari Bim Amude Alkatiri atu halo iha Distritu Oecusse nee sei illegal tamba too ohin loron nee seidauk iha lei hodi legalize projetu nee.

Atu halao projetu nee presiza lei tolu,  Lei  ba statuto especial Oecusse, Lei atu hari’i zona espesial Oecusse no Lei kria autoridade, lei sira nee governu mak prepara lori ba parlamentu aprova.

“Seidauk iha baze legal, Lei ba statuto especial Oecusse ninian ne’e seidauk iha,  Konstituisaun dehan katak  iha direitu ba atu lori inisiativa ekonomika sosial ne’e seidauk   iha, Lei ba atu hari’i zona espesial  de primeiru merkado nian seidauk iha, Lei para atu kria autoridade ne’e seidauk iha, tantu lei tolu prinsipal tolu ne’e laiha atu lao ba oin,”Mari Alkatiri relata asuntu ne’e ba Jornalista sira Sesta (22/11) iha Palacio Nobre Lahane, Dili.

Maske Lei ne’ebe refere to’o ohin loron ladauk iha, maibe nia prosesu ba projetu Master Plan ne’e kontinua lao, tantu kestaun Lei tolu ne’ebe mak ladauk iha ne’e nia sei hato’o uluk ba Governu hodi haree asuntu ne’e.

“Hau nia pedidu hau seidauk ba parlamentu, hau hakarak koopera uluk ho Governu e Governu mak lori ba parlamentu,”haktuir Alkatiri.

Hatan konaba fiar ne’ebe mak Primeiru Ministru (PM), Kayrala Xanana Gusmao fo ba nia (Alkatiri-Red) hodi lidera zona especial Oecusse ne’e nia dehan ne’e laos nomeasaun politika ba FRETILIN, maibe nomeasaun ne’e nudar akordu ida ne’ebe mak entre nia (Alkatiri-Xanana) mak halo.

“To’o agora knar ne’ebe hau halao ne’e hanesan akordu ida entre Hau (Alkatiri) ho Primeiru Ministru),  ami mak tur hamutuk nia husu hau halo, mas hau hatete ba Primeiru Ministru imi sala hau kritika,”haklaken eis PM iha primeiru Governu Konstitusional ne’e.

Nudar mos Lider partidu istoriku FRETILIN, Mari Alkatiri komenta, fiar ne’ebe mak PM Xanana fo ba nia ne’e oinsa hamutuk para dezenvolve rai ida ne’e hodi bele hakat ba oin.

“Oposizaun tenki servisu mos para atu halao dezenvolvimentu, oposizaun laos atu hakilar deit atu manan eleisaun, ne’e ita nia konseitu oposizaun que ita muda oituan. Tanba ita hahu hari’i Estado foun ida ita hametin ita nia Nasaun ita tenki halo dezenvolvimentu, que oposizaun mak la partisipa iha prosesu halo dezenvolvimentu hanesan hein deit  no hakilar manan deit eleisaun ne’e oposizaun iha rai dezenvolvidu ona mak  bele halo hanesan ne’e, ba ita rekursus humanus ne’ebe oituan ita tenki fo liman ba malu para lori dezenvolvimentu ne’e para hasai povu husi kiak,”tenik Alkatiri. alf

Be Sociable, Share!

Leave a Reply

Your email address will not be published.